من 10 سنين ابتديت اول مشروع ليا وكان عبارة عن شركة دعاية واعلان متخصصة فى تقديم خدمات تصميم المواقع والتسويق الإلكتروني، لما ابتدينا نبيع خدماتنا للعملاء قابلتنى مشكله وهي ان الناس معندهمش خلفية عن خدمات التسويق الإلكتروني، وعشان أسهل على الناس بتوع المبيعات عندنا، عملتلهم ساعتها بروشور بيشرح وضع العميل فى اللحظة اللى احنا فيها دلوقتى والوضع اللى المفروض يكون عليه وحلقة الوصل بينهم هى الحل اللى بنقدمهوله وفيه توليفة من خدمات التسويق الإلكتروني زى تصميم الموقع والاعلان المدفوعة على جوجل واعلانات الفيسبوك الممولة … الخ
لو عندك شركة وعاوز تتواجد اونلاين هتلاقى هنا كل المعلومات اللى ممكن تحتاجها عن التواجد اونلاين وازاى تبنى هوية كاملة للشركة مش بس كده انت هتتعلم ازاى يكون تواجدك فعال.
جدول المحتوى
- ايه هو التسويق الإلكتروني؟
- عمل بحث تسويقى
- بناء العلامة التجارية
- كتابة محتوى الموقع
- حجز الدومين
- حجز الهوستينج
- تصميم الموقع
- تسويق المحتوى
- التسويق على محركات البحث
- طرق التسويق التقليدية
- تسجيل بيانات الشركة على الدلائل المحلية والعالمية
- الاعلانات الممولة
- التسويق على السوشيال ميديا
- التسويق من خلال البريد الإلكتروني
- التسويق من خلال الموبيل
- العلاقات العامة
عمل بحث تسويقى
- تقييم الوضع الحالى
- تحديد المنافسة
- الجمهوم المستهدف
ممكن نستخدم معلومات فهم السوق من المقالة
تصميم استراتيجية فعالة
- Attract
- Engage
- Inform
- Convert
بناء العلامة التجارية
كتابة محتوى الموقع
حجز الدومين و الهوستينج (الاستضافة)
الدومين هو اسم الشركة على الانترنت وده اللى بيكتبه العميل عشان يدخل على الموقع بتاعك، زى موقع شركتنا morshedworx.com
فى شركات كتير بتقدم خدمة تسجيل الدومين واشهرهم Godaddy – Bluehost – Whois – Hostgator
سعر الدومين مش بيختلف كتير والخدمة واحده ومفيش اختلاف فى الجوده، فاختيارك هيكون بناءاً على حاجه تانيه وهى الاستضافة، يفضل يعنى انك تحجز الدومين والاستضافة من شركة واحده عشان بيسهل عليك ربط الدومين بالاستضافة، حاجه اسمها DNS، مش محتاج تعرف عنها حاجه لان الخطوات بتاعت التسجيل وربط الموقع بتحصل بشكل اوتوماتيكى اصلاً
بالنسبه للاستضافة ففيها كلام كتير اوى واختلافات كتير اوى وهيكون صعب انك تفهم الفروقات اللى بينهم الا لو كنت حد ليك فى التكنولوجيا، فعشان اختصر عليك برضو، كل الاستضافات زى بعضها والحاجه الوحيدة اللى بتفرق بينهم هى خدمة ما بعد البيع، اقصد خدمة العملاء.
شوية نصائح بقى بخصوص الجزئية دى
- اشتغل مع جودادى – Godaddy هم مش ارخص حاجه فى السوق بس الافضل فى خدمة ما بعد البيع وده بتحتاجه جداً
- متسترخصش، استثمارك فى الاستضافة شى اساسى وهيريحك جداً فى المستقبل
- حاول تحجز اسم نطاق دوت كوم، كل الناس متعوده تكتب دوت كوم من غير متفكر
- خلى اسم الدومين سهل ومختصر وبيعبر عن الشركة ونشاطها
- بلاش تحط ارقام فى الدومين
ده دليل كامل بشرح فيه ازاى تحجز الدومين والاستضافة
تصميم الموقع
هل هتصمم موقع بنفسك؟
لو عندك شوية خبرة ووقت او مش معاك ميزانية كفاية وبتدور على حل تقدر بيه تصمم موقع الكتروني بنفسك، فى مواقع كتير بتقدملك الخدمة دى مجاناً اشهرهم موقع اسمه Wix وموقع اسمه WordPress
تعالوا نشوف ازاى تعمل تصميم موقع مجاناً على Wix
موقع Wix بيقدملك خدمة تصميم موقع مجاناً من الألف بكل سهوله، كل اللى عليك انك تسجل حساب عليه وبعدين تختار التمبلت اللى يعجبك من نماذج مواقع جاهز كتيير مبنية بجوده عالية واحدث التكنولوجيا اللى موجوده فى السوق وحتى التعديل وتصميم المواقع سهل جداً.
ده شرح كامل ازاى تقدر تصمم موقع على Wix
تعالوا نشوف ازاى تعمل تصميم موقع مجاناً على WordPress
موقع WordPress يعتبر واحد من اكبر المؤسسات اللى بتقدم خدمة تصميم موقع مجاناً، وده جنب حلول تصميم مواقع غير مجانيه، بس تكلفتها مش عالية خالص، وبتدفع شهرياً.
هتتعامل مع شركة تصميم مواقع؟
لو قررت انك تشتغل مع شركة تصميم مواقع، فخلينى اقولك ازاى تختار افضل شركة تصميم مواقع وازاى تتفق معاهم على تصميم الموقع اللى فعلاً يحققلك الفايدة اللى انت مستنيها مش مجرد موقع وخلاص
بص الاول وقبل كل حاجه انت عارف السوق المصرى مضروب فى حاجات كتير، وده بيخلي فى تضارب رهيب فى الاسعار، يعنى لو اختارت مثلاً لو دخلت على جوجل ودورت على شركات تصميم مواقع ودخلت على اول ١٠ شركات تصميم مواقع، وبعتلهم طلب عرض سعر للموقع بتاعك هتلاقى فى شركة تصميم هتقولك تصميم الموقع ده هيكلفك ٥٠٠ جنية وشركة تانيه هتقولك تصميم الموقع هيكلفك ٣٥ الف جنية!
مشكلة الموضوع ده فى انه منتج مش ملموس، تعالا نبصلها على انها منتج ملموس مثلاً ليه ممكن يكون فى فرق بين الاسعار بالشكل ده مانا بشترى نفس الحاجه؟! انا نفسى لما كان حد بيسالنى ليه الموقع غالى كده انا فى واحد قالى ٥٠٠ جنية، كنت بقوله عارف الفرق بين العربية الهوندا والمرسيدس
تعالا نوضح الفرق بين الاسعار ده جاى منين وعشان نعمل ده محتاجين نوضح انواع تصميم المواقع والفروقات بينهم:
تصميم موقع الكتروني ستاتيك
الموقع الاستاتيك ده يعتبر ارخص حاجه موجوده فى السوق وده عبارة عن تصميم موقع باستخدام HTML – CSS وده موقع الكتروني بسيط جداً مكون من صفحة او اكتر وبيقدم معلومات عن الشركة بتاعتك ومش بيكون داخل فيه برمجه ولا قواعد بيانات وعشان تعمل اى تعديل عليه لازم يكون عندك معرفه بالـ HTML – CSS
سعره بيتراوح ما بين ٥٠٠ لـ ١٠٠٠ جنية
تصميم موقع الكتروني دينامك
الموقع الدينامك عبارة عن موقع داخل فيه برمجه وقواعد بيانات وبيكون معاه لوحة تحكم بتخليك تقدر تضيف اى محتوى جديد او تعدل على المحتوى الموجود بالفعل، وده النوع المطلوب والاكثر استخداماً بين شركات تصميم المواقع
سعره بيبدء من ٢٠٠٠ جنية
التكلفة بتختلف بناءاً على حجم المحتوى والوظائف اللى بيؤديها الموقع وطبعاً الوظائف دى بتختلف من موقع للتانى على حسب نوع النشاط اللى بيخدمه الموقع والوظائف دى زى البحث وادارة المحتوى والمتجر … الخ
فى ناس كتير كانت بتكلمنى عاوزين متجر الكتروني زى سوق وجوميا او موقع بيقدم حجز فنادق … الخ، بالنسبة للجزئية دى فى نقطة احب اوضحها قبل منكمل وهى انك لو بتفكر تنافس سوق او جوميا او عقار ماب او تريفاجو او اى موقع تانى لازم تكون فاهم ان المواقع دى بيضخ فيها ميزانية ضخمة جداً وبحصل تطوير عليها دايماً فلما تروح لشركة تطلب منها تصمملك موقع زى سوق لازم تكون فاهم الميزانيه هتكون كبيرة بشكلاً ما، فى حل طبعاً بديل لو عاوز تبدء حاجه زى دى وهى انك تطلب من شركة التصميم انهم ينفذوا الشغل بثيم جاهز، ده هيوفرلك وقت وفلوس كتير اوى وبرضو الشغل هيطلع تمام وجودته عاليه.
طب ايه الفرق بين استخدام ثيم جاهز او كتابة الكود من الصفر؟
بالنسبة للحماية: المواقع الإلكترونية اللى بيتم تصميمها من الصفر بتكون اكثر حماية لان الكود بتاعها بيكون فريد من نوعه ومش معروف للعامة وده بيخلى نسبة الامان فيه عالية على عكس المواقع الجاهزه زى وردبرس مثلاً، ده طبعاً مش معناه ان مواقع الوردبرس الحماية فيها ضعيفة، لا دى عالية جداً برضو بس لازم يتعمل حسابها وبيدفع فيها فلوس برضو عشان تأمن موقعك.
بالنسبة للتكنولوجيا: تقريباً نفس التكنولوجيا هى هى فى تنفيذ الموقع من الصفر او باستخدام ثيم جاهز، يعنى لغات البرمجة هى هى وقواعد البيانات برضو هى هى
بالنسبة للاسعار: بالنسبه للموقع لو هيتنفذ من الصفر هتبدء تكلفته من 30 الف وانت طالع بقى ولو هتعمل نفس الموقع باستخدام ثيم جاهز هيتراواح ما بين 10 الى 15 الف اجمالى
القرار ليك فى الاخر بس نصيحة لو فى عندك فكرة موقع الكتروني بالشكل ده ابدء بالثيم الجاهز هيوفر معاك وقت كتير وفلوس اكتر وهيوفى بالغرض اللى انت عاوزه منه، انما لو الموضوع بقى مشروع وهيكبر وهتستثمر فيه فلوس كتير وناوى تكبره فى المستقبل فالاحسن انك تجيب فريق عمل فى الشركة عندك يعملك الشغل لان ده هيساعدك على التطوير دايماً لان الاكواد البرمجية هتكون تحت ايدك.
اكتب محتوى ونزله على الموقع
المحتوى يعتبر اقوى اداة للتسويق للبيزنس بتاعك، وده لانه بيخدم البيزنس عشان بيثبت للجمهور بتاعك انك على دراية بمجال الصناعة اللى انت فيه وده بيخلى الناس تثق فيك وتتحول من مجرد زوار لموقعك لعملاء ويشتروا منك، برضو لما بتكتب محتوى مع الوقت المحتوى ده بيظهر على جوجل، فلما حد يكون بيدور على جوجل بكلمات بحث ليها علاقة بمجال الصناعة بتاعك، فيظهر موقعك وبالتالى ده يجيبلك زيارات للموقع ومنها يتحول الزوار لعملاء ويشتروا منتجاتك.
لو هنضرب مثال على ده، احنا فى المقالة دى كان الهدف اننا نوصل للناس المعلومات الكامله اللى تخدم تواجدهم اونلاين، وبرضو كنا عاملين حسابنا ان لما الناس تدور على جوجل عن: “تصميم مواقع” ، “شركة تصميم مواقع” ، “تسويق الكتروني” تظهر الصفحة دى،
المقالة دى كتبناها يوم 12 يناير 1019، عشان المقالة دى تظهر فى اول صفحة هتاخد وقت، بس لو انت داخل من على جوجل ده معناه ان احنا حققنا هدفنا من المقالة دى، ياريت تسيلنا كومنت تقولنا انك دخلت من على جوجل وكنت بتدور على ايه؟
دلوقتى وبعد معرفنا اهمية كتابة المحتوى على الموقع، تعالوا نعرف ازاى نكتب المحتوى المناسب
اعمل Buyer Persona
ودى عبارة عن وصف كامل للعميل اللى بيشترى منك، زى هو مين وشغال ايه وعمره قد ايه؟ ده هيساعدك جداً تعرف امتى توصل للعميل وتعرض عليه المنتج ازاى.
عشان تعمل الـ Buyer Persona هتختار عميل من كل فئة من العملاء بتوعك، لو طبقنا ده على شغلنا احنا فاحنا عندنا اكتر من Buyer Persona وهم كالتالى:
- طالب / عمره من 17 الى 21 سنة / من دوله عربية / بيفكر يعمل مشروع
- موظف / عمره من 21 الى 30 سنة / من دولة عربية / بيفكر يعمل مشروع
- صاحب مشروع / عمره من 21 الى +65 / من دولة عربية
هتلاقى هنا مقالة كامله عن الـ Buyer Persona وازاى تعملها خطوه بخطوة
اعمل Buyer Journey
حدد الطريقة اللى هتكتب بيها
لو هتكتب محتوى عربى، هل هتكتب باللغة العربية الفصحى ولا اللغة العامية؟ بالنسبة للمصطلحات، هل هتستخدم ترجمة ليها ولا هتستخدم الانجليزى مع العربى؟ لازم تحدد بالظبط الشكل العام والطريقة اللى هتتكتب بيها المحتوى، احنا مثلاً بنكتب بالعامية وبنستخدم المصطلحات بالانجليزى فى الكلام.
حدد اهداف للمحتوى اللى هتكتبة
خلينا نبقى متفقين على حاجه اساسية فى اى خطوه بتاخدها وهى انك متكتبش اى محتوى قبل متكون محدد على الاقل 3 اهداف ليه، احنا مثلاً بنكتب محتوى عشان 3 اهداف رئيسية:
- نساعدك تتعلم طرق جديدة وفعالة للتسويق الإلكتروني
- نظهر على جوجل لما حد يدور على دليل التسويق الإلكتروني
- نزود مبيعاتنا
اعرف ازاى تحدد اهداف للمحتوى بطريقة SMAR
حدد القنوات اللى هتنشر عليها المحتوى
دلوقتى بعد مكتبت المحتوى جيه الدور عليك فى نشر المحتوى، طبعاً مش محتاج اوضحلك انك لازم تنشر المحتوى بتاعك على قد متقدر فى كل حته ممكنه لان ده الهدف منه وهو ان الناس تشوفه، فى طبعاً اماكن كتير تقدر تنشر عليها المحتوى، زى:
- على المدونة الخاصة بيك
- تبعت ايميل للمشتركين عندك
- على مواقع السوشيال ميديا
اعمل جلسة Brainststorming لافكار للمحتوى
دى تعتبر واحده من اصعب المهام لما تيجى تكتب محتوى تسويقى وهى هنكتب ايه؟ المطلوب منك فى المرحله دى انك تعمل اجتماع مع فريق العمل فى الشركة عندك وتعرض عليهم الموضوع وتطلب منهم يقولولك افكار عن مواضيع هم شايفين انها مهمه وهتفيد العميل بتاعك لما يقراها، المفروض تطلع بشوية مقترحات تبنى عليها المحتوى وطبعا لو فى حد يقدر يساعد فى انه يكتب محتوى عن الموضوع اللى هو اقترحه ده هيكون حلو جداً.
اربط المحتوى بالبيع دايماً
بعد متاخد المقترحات بعد جلسة الـ Brainstorming هتبدء تحلل المحتوى اللى اخدته، بمعنى انك هتحدد انهى محتوى اللى هيتكتب ويكون ليه علاقة بالمنتج بتاعك، بمعنى انك لما تكتب محتوى لازم فى النهاية المحتوى يكون بيؤثر بشكل واضح فى عملية البيع.
احنا مثلاً بنقدم محتوى ليه علاقة بالحاجات دى لان فى النهاية دى المنتجات اللى بنقدمها للعملاء بتوعنا، زى:
- تصميم المواقع
- التسويق الإلكتروني
- دعاية واعلان
- تصميم جرافيك
- اعلانات مموله
حدد نوع المحتوى
نوع المحتوى اللى هتقدمة هيختلف على حسب طبيعة البيزنس بتاعك، ممكن تختار طبعاً الانسب ليك، احنا عندنا بنقدم مقالات مفصله عن التسويق الإلكتروني وتصميم المواقع، وصور انفوجرافيك وعاملين حسابنا اننا نعمل فيديوهات بنشرح فيها التسويق الإلكتروني بالتفصيل.
دى مقالة بانواع المحتوى اللى ممكن تقدمة
حط الخطة على الـ Editorial Calendar
دى مقالة طريقة كتابة محتوى تسويقى فعال
