الكلمة هي لغة التواصل الأولى، بالكلمة تقدر تقنع اى حد يعمل اى حاجه في اى وقت انت عاوزه!
عشان اختصر عليك؟ عشان تبيع منتجك على الفيسبوك او في اى حته تانيه، لازم الاعلان يكون مقنع كفاية انه يخلى العميل ياخد خطوه لقدام فى رحلة الشراء.
صناعة محتوى اعلانى تعتبر واحده من اغلى واكثر المهارات المطلوبه فى السوق دلوقتى، الصراحه مش دلوقتى بس، هى بقت معروفه دلوقتى اكتر من زمان، والسبب ان الناس اللى عندها المهاره دى بتعرف تبيع اى حاجه.
انا مقتنع تماماً انها موهبه اكتر منها مهاره الصراحه، مش بصعبها عليك، كلنا عندنا نفس الامكانيات اللى تخلينا نكتب محتوى اعلانى، لكن فى ناس عندها القدره انها تخليك تاخد فعل معين تجاه منتجهم بشكل فظيع، انا قابلت ناس كتير كده.
كتابة وصناعة المحتوى الاعلانى فى النهاية هى تانى اكتر حاجه مهمه فى حملة الاعلانات، لان بيها هتقدر تقنع العميل انه يوصل لمرحله يشوف فيها العرض بتاعك افضل عرض وانه لازم يشتريه دلوقتى.
في طرق واستراتيجيات كتير معروفة في المجال بتاعنا ومعظم الناس بتستخدمها زى AIDA مثلاً وهى اختصار لأربع كلمات وهم الوعي، والاهتمام، والرغبة والفعل.
مش هنتعمق في المقالة دى عن نموذج AIDA او غيرة من النماذج اللى بيستخدمها المسوقين في كتابة الإعلانات، خلينا نشوف انت محتاج ايه عشان تكتب محتوى الاعلان بتاعك:
ازاى تكتب محتوى اعلانى مميز في 3 خطوات بس؟
1. حدد هدفك من المحتوى اللى بتكتبة
لازم تفهم ان الهدف من الاعلان بتاعك هو انه يخلى الناس تاخد خطوه لقدام فى رحلة الشراء، انا عارف انى كررت الكلام ده اكتر من مره، معلش … بس فعلاً النقطه دى مهمه جداً.
كل الشركات بتحاول تبيع منتجاتهم من الاعلان لعملاء ممكن يكونوا محتملين بس هم حرفياً اول مره يسمعوا عنهم، خد نفسك كمثال: عمرك اشتريت حاجه من على الفيسبوك لمجرد انك شوف الاعلان بتاعها؟ ماعتقدش!
2. الإعلان لازم يلفت انتباه العميل
مش بس كده ده لازم يجبره انه يقرأه بالكامل، ويحفزه انه يأخذ خطوه كمان ويدخل على الموقع بتاعك زي مقولنا في افضل استراتيجية تسويق.
في روايات وكتب اول متفتح الفهرس تلاقى نفسك مش عارف تسيبها الا لما تخلصها، زى مبيقولوا قريته من الجلده للجلده، انا بكلمك فى كتب كبيرة متقلش عن 200 صفحة، هل ده مش بيحصل صدفة؟ لا طبعاً، الكاتب عارف ازاى يخطفك ويخليك تكمل للاخر.
ايه اللى ممكن يخطف انتباه العميل بتاعك ويجبره انه يدخل على الموقع بتاعك؟ لو عاوز اجابه مختصره، فالمحرك الاساسى للناس هى الرغبة والفضول فى كشف المخفى او المستور، طبعاً الى جانب شوية حاجات تانيه زى (الصدمة – الفوائد – الخوف – الغرور).
دائماً خلى في حاجه ناقصة، معلومة بقى او سعر او تفصيلة انت عارف ان الناس محتاجه تعرفها … الخ
3. جرب وعدل لحد متوصل
احنا شغالين اونلاين ودى ميزة حلوة جداً لانك في النهاية تقدر في اى وقت تعدل على الإعلان بسهولة، مش زى الإعلانات المطبوعة، وخدها قاعدة أساسية، طول مالناس مش بتاخد الفعل اللى انت عاوزه ارجع وعدل لحد متوصل لان اعلانك بيحقق الهدف المطلوب منه.
ساعتها بس هتكون عملت اعلان ناجح! وده ببساطه لان الإعلان اللمميز مش اللى بيعجب الناس ويقعدوا يقولوا واو اعلان جميل، لا بالعكس الإعلان الناجح هو اللى بيحقق مبيعات حتى لو كل الناس كرهته.
