مفيش مشروع مبيحتاجش تمويل، بس مش كل المشاريع محتاجه تمويل كبير وفى ظل الغلاء ومحدودية الدخل، اصبح السؤال ازاي توفر الفلوس الى تبدء بيها مشروعك؟ الى متعرفوش ان في مشاريع كتيره أصبحت عالمية بدأت بتمويل صغير جداً، زي شركة ابل وجوجل وكنتاكي وغيرها كتير، كل الى انت محتاجه هو طريقة مختلفة تتعامل بيها مع دخلك عشان توفر مبلغ تبدء بيه مشروعك الى هيحققلك الحرية المالية.
بس حتى لو قدرت توفر المبلغ المطلوب مش هو ده الى بيضمنلك نجاح المشروع، لأن المشاريع اللى بدأت صغيرة وكبرت كان ليها طرق صحيحة اتنفذت بيها، في اندر زيرو هنقولك في ٦ خطوات على طريقة تقدر بيها تضمن نجاح مشروعك لو عملتهم.
اولاً: فكرة المشروع
الفكرة من اهم عوامل نجاح المشروع، ممكن تكون فكرة جديدة متعملتش قبل كده وده بيديها فرصه كبيرة في النجاح او فكرة مكرره ممكن تتنفذ بطريقة مختلفة وتقدم ميزة تنافسية عن الى موجود في السوق.
لو معندكش فكرة حاضرة في دماغك، دور جواك على اكتر حاجه بتحبها وبتعرف تعملها، وفكر ازاى تطورها عشان تفيد بيها اكتر عدد من الناس، لان ممكن تجيلك فكرة عبقرية بس بتخدم فئة محدود من الناس، وده واحد من أسباب فشل كتير من المشاريع.
لو عندك فكرة او قدرت توصل لفكرة، انت محتاج تقيمها عشان تأخذ قرار بقابليتها للتنفيذ ولا لا.
وعشان تقيم فكرتك محتاج تناقشها مع عينة من عملائك المحتملين، ممكن يكونوا مجموعة من الأصدقاء او العيلة، الى انت شايف انهم ممكن يشتروا المنتج او الخدمة الى هتقدمها.
ومن مناقشاتك معاهم هتقدر تعرف إيجابيات وسلبيات الفكرة وده هيساعدك في تطوير فكرتك علشان تقابل احتياجاتهم.
خطوات ايجاد فكرة مشروع ناجح
- دور على مشكلة الناس بتعانى منها
- فكر في حل للمشكله
- اكتب المشكلة والحل على ورقة
- اعرف مين هيشترى منك المنتج او الخدمة
- اتناقش مع صحابك وعيلتك عن الفكرة
- طور الفكرة في ضوء السلبيات والايجابيات الى هتسمعها منهم
اقرأ مقالة ازاى تلاقى فكرة مشروع ناجح؟
ثانياً: تخطيط مشروع ناجح
تخيل شكل مشروعك بعد ٥ سنين من بدايته وحدد الأهداف الى عاوز توصلها واتاكد ان كل هدف من أهدافك الى حددتها على المدى البعيد (واضح ومحدد، وتقدر تقيسة، ويكون مقنع وواقعى في ظل ظروف السوق الى انت شغال فيه واهم حاجه انه يكون محدد بمدة زمنية لتحقيقه
بعد محددت الأهداف هتبدء تحط محطات واضحة على طريق الوصول لهدفك، كل محطه من دول تعتبر هدف اصغر بيقربك من الهدف الكبير، وكل الى مطلوب منك انك تفكر هتوصل ازاى للمحطه الى جاية.
خطوات تخطيط مشروع ناجح
- حدد اهدافك البعيدة
- اتاكد من قابليتها للتحقيق
- اكتب خطة شاملة بالمطلوب للوصول للأهداف
- قسم كل هدف لاهداف اصغر
- حط الأهداف في اطار زمني
- حدد المطلوب لتحقيق كل هدف
- ركز على تنفيذ المرحلة الاولى
- اكتب خطة التسويق وخطة المبيعات
ثالثاً: تجهيز المشروع
دلوقتى فكرتك واضحة وخطتك جاهزة، تقدر تبدء بس قبل متبدء محتاج تجهز شوية حاجات عشان توفر عليك وقت ومجهود في البداية.
تجهيزات قبل بداية مشروع ناجح:
- استقر على اسم الشركة
- حدد الشكل القانوني للشركة
- اختار الألوان والشعار المناسب لشركتك
- جهز المحتوى التعريفي للشركة والمنتجات او الخدمات
- جهز الأدوات التعريفية بالشركة (برشور، وكروت شخصية وموقع الكتروني وصفحات تواصل • اجتماعي … الخ)
- جهز صيغ الاتفاقات بينك وبين الموردين والعملاء (العقود)
- حدد البدائل المتاحة لمكان الشركة واختار الافضل
اقرا مقالة: حط اساسيات المشروع بتاعك على الـ Business Model Canvas
رابعاً: بداية مشروع ناجح
الوقت عامل حساس جداً في بداية المشروع الناجح، هيبقى عندك تكلفة ايجار المكان والنور والمياه والغاز والتليفونات والانترنت وحاجات تانية، حاول بقدر الإمكان متضيعش وقت كتير، يعنى مثلاً وانت بتجهز في المكان تمشى في إجراءات تسجيل الشركة، وتحجز الدومين والهوستينج وتفنش الموقع، ولو محتاج مطبوعات وديها المطبعة، وابدأ نزل إعلانات على مواقع التوظيف واعمل مقابلات عشان دى عملية بتاخد وقت كبير.
فريق العمل من اصعب التحديات الى هتقابلك، الفريق ممكن يبقى شركاء او موظفين، في الشركات الناشئة فريق العمل ليه مواصفات تأنيه خالص بتحدد اذا كان الشخص ده يصلح ولا لا، احنا لخصناهم في حاجتين:
- مؤمن بالمشروع ومصدق بالرؤيا بتاعتك
- عنده من الاحترافية الكفاية انه يطلع الشغل بالجودة المطلوبه
نصيحة: عادى جداً انك تقابل ١٠٠ شخص ومتلاقيش واحد مناسب، قابل ١٠٠ غيرهم لحد متلاقى الموظف الفت.
خامساً: تشغيل مشروع ناجح
لو عندك احسن منتج في الدنيا ومحدش سمع عنه، محدش هيشترية، ده بيعرفك قد ايه التسويق مهم جدا، فاول حاجه تعملها انك تبدء تنفذ خطة التسويق الى جهزتها.
مع بداية الطلب على منتجك هتبدء العجلة تتحرك ولما تتم عملية بيع بالكامل، ده معناه ان العجلة دارت دورة كاملة وده مؤشر من مؤشرات النجاح، كل اللى مطلوب منك انك تحافظ علي مسارها وتزود سرعة دورانها عشان توصلك لهدفك في الوقت المحدد، وده ينقلنا للمرحلة التالية وهي الإدارة.
سادساً: ادارة مشروع ناجح
عشان تحافظ على دوران العجلة وتوازنها ويظل المشروع ناجح، لازم تعالج اي مشكله تقابلك، خلى هدفك قدامك وركز في طريقك ودايماً قارن بين الخطة الى انت راسمها وبين النتايج الى بتوصلها.
وانت ماشى في الطريق اكيد هيقابلك عقبات مكنتش متوقعها، ممكن تضطرك لتعديل خطتك وده طبيعي في بداية اى بيزنس، لحد متوصل للنموذج المثالى لإدارة الشركة.
لما توصل للنموذج المثالى سجلة بكل تفاصيلة، كل مهمه من اختصاص مين والإجراءات المطلوبة لكل مهمه وطريقة تنفيذها، بكده هيكون عندك دليل كامل لنظام شركتك اللى بنسمية السستم اللي بية الشركة تقدر تمشي حتي من غيرك فلو موظف فكر يسيب الشغل في أي لحظة انت عندك في الدليل كل المهام الموكله ليه وتفاصيلها، بالتالى مش محتاج تضيع وقت مع الموظف الجديد اللى هيشتغل مكانة.
تقدر تعمل مشروع ناجح ولا لا؟
