عشان تبيع لازم تعرف 4 حاجات مهمة جداً، نفس الحاجات دي هي اللي بتخلينا نعرف نبيع لنفسنا ونبيع للعملاء بتوعنا.
- البيع نتيجة حتمية للتسويق المستمر
- لازم نقدم حل لمشكلة العميل
- العميل مش هيشترى من نفسه
- البيع محتاج ناس بتعرف تقفل البيعة
لو وفرت الأربع حاجات دى في البيزنس عندك، اضمن لك انك تبيع لأي عدد عملاء انت عاوزه.
بس لازم في الاطار ده تكون عارف ان مفيش حد يعرف قيمة المنتج اللى بتبيعه قدك، وان الناس اللى انت عاوز تبيعلهم المنتج معندهمش اى فكرة عن منتجك، وانت عاوز توصلهم انهم يشتروا، هتعمل ايه؟ وهتحتاج قد ايه عشان تقنعه يشترى منك؟ طب في حالة ان المنتج سعره غالى او معقد زى الخدمات اللى بنقدمها كشركة تسويق! هل محتاج أسبوع؟ شهر؟ سنه؟
اتكلمنا قبل كده عن رحلة الشراء وقولنا ان مدتها بتختلف على حسب طبيعة المنتج، في منتج او مالعميل يشوفه يشتريه ومنتج تانى ياخد سنه، انت اكيد عارف المنتج بتاعك اكتر منى.
في قاعدة أساسية في التسويق بتقول ان العميل عشان يشترى المنتج لازم يمر بسبع نقاط تواصل مع المنتج والبيزنس قبل ميشترى، بطرق مختلفة بقى زى انه يشوف اعلان ليك على الفيسبوك او في التلفزيون او يسمع من صديق ليه عنك … الخ.
عشان كده لازم تركز على توصيل قيمة المنتج او الخدمة اللى بتقدمها للعميل لحد ميشوفها زى مانت شايفها، لو ده حصل تأكد تماماً ان العميل ده هيشترى المنتج وهو مغمض.
في طرق كتير تقدر توصل العميل للمرحلة دى زى:
- الإعلانات المدفوعة على القنوات المختلفة
- نشر مقالات على المدونة الخاصة بيك
- عمل فيديوهات توضيحية او شرح للمنتجات
- بناء قاعدة عملاء محتملين عن طريق الايميل
- التليفون وخليك متاح دائما للعميل وسهل يوصلك
المختصر المفيد:
خلى المبيعات اخر حاجه وركز على تقديم تجربة فريدة ومحتوى قيم عشان عميلك يشوف منتجك زى مانت شايفة وحاول دايماً تخلى الكونفرجن اخر حاجه، متقولش للعميل اشترى وخلى القرار يكون نابع منه بناءً على القيمة وده هيحصل لو العميل شاف المنتج زى مانت شايفه.
وده دورك لازم توصل قيمة اللى بتعمله للعميل بتاعك.
