لو سألتك عندك شك او خايف ان ربنا ما يبعتش ليك رزق بكره؟ اكيد هتقولي لا … “وفي السماء رزقكم وما توعدون” طيب لما هو كده ليه لسه مستني فى وظيفة ملهاش مستقبل لحد دلوقتي؟!!
اللى عاوزك تتاكد منه ان رزقك لو قليل او كتير كده كده جايلك، بس لازم تسعى، وتعمل كل اللى عليك لان ربنا بيسبب الاسباب، ووجودك هنا ممكن يكون سبب.
خلينا نوضح المشكله فين؟ … المقالة طويلة شوية بس تستاهل وقتك
السؤال الى لازم نجاوب عليه هو، ليه الغني بيزيد غنى والفقير بيزيد فقر؟
فى مصر، كلنا اتربينا من صغرنا على افكار وقيم معينه، غالباً انت منتج اتجمع فيه صفات الاب وصفات الام، فبناءاً على معتقدات الاب والام بتتكون شخصيتك ومبادئك الى بتكمل بيها طول عمرك، ده السبب الاصلى ليه الغنى بيزيد غنى والفقير بيزيد فقر.
اوعى تفتكر ان دى مقالة تنمية بشرية، انت هتتعلم ازاى ترسم وتخطط لمستقبلك.
لو فقير فانت مريت بالمراحل دى وهتمر فى المستقبل بالمراحل الى بعدها “اتفحت فى الثانوية، عشان تدخل جامعة كويسة، يفضل هندسه او طب، عشان تلاقي وظيفه كويسه تاخد منها مرتب حلو، وتحوش عشان الشقة والجواز، وبعدين تحوش عشان العربية” دى كل اهدافك فى الحياة.
الى بيحصل انك بتفضل طول الوقت تجرى ورا اهداف بتاخد منك فلوس، وده بيخليك تشتغل طول الوقت عشان توفر فلوس تغطى احتياجات الى فرضتها على نفسك وخلتك تفكر بالعقلية الاستهلاكية دى.
خلينا نتخيل كده السيناريو واحده واحده:
فى اول ٢١ سنة من حياتك كل الى مطلوب منك انك تتنقل من الابتدائية عشان توصل للجامعة، وبعد كده بتتخرج مش فاهم ولا اتعلمت اى حاجه من الجامعة، بالتالي مش هتلاقي الوظيفه المناسبة و دى اول صدمة بتاخدها فى الى اتربيت عليه، تفتكر هتغير من تفكيرك، لا هتكمل وتروح تدور على اي كوسات تأهلك لوظيفة احلامك ، السؤال هنا يوم لما تشتغل هتقبض كام يعنى، ٣٠٠٠ جنية؟
تعالوا نفترض انك اشتغلت الشغلانه الواو الى هتبدء بمرتب ٣٠٠٠ جنية (فرضية غير واقعية طبعا)، تقدر تقولى هتعمل ايه؟
فى الغالب هتكمل فى طريقك الى انت متخططلك تمشيه. ازاى ده؟ من الاب والام، وهتبدء رحلة التوفير المتين، فى نوع بيعرف يقفش على نفسه ويوفر ٢٥٠٠ جنية ويمشى نفسه بـ ٥٠٠ جنية طول الشهر، تخيل اجمل ايام عمرك بتقضيها بـ ٥٠٠ جنية فى الشهر، ولا هتخرج ولا هتلبس ولا هتعمل اى حاجه، بس مش مهم كله يهون، وفى نوع تانى الاستهلاكية واخده حدها معاه، فهيصرف مثلاً الفين ويحوش الف.
شوية حسابات بقى عشان نحط الاحتمالات
لو بتوفر ١٠٠٠ فى الشهر، هتوفر كام فى السنة؟
١٠٠٠ فى ١٢ شهر= ١٢ الف جنية
لو بتوفر ٢٠٠٠ فى الشهر، هتوفر كام فى السنة؟
٢٠٠٠ فى ١٢ شهر= ٢٤ الف جنية
لو بتوفر ٣٠٠٠ فى الشهر، هتوفر كام فى السنة؟
٣٠٠٠ فى ١٢ شهر= ٣٦ الف جنية
لو بتوفر ٤٠٠٠ فى الشهر، هتوفر كام فى السنة؟
٤٠٠٠ فى ١٢ شهر= ٤٨ الف جنية
لو بتوفر ٥٠٠٠ فى الشهر، هتوفر كام فى السنة؟
٥٠٠٠ فى ١٢ شهر= ٦٠ الف جنية
طيب عشان تجيب شقة وتتجوز محتاج كام؟
نقول مثلاً هتجيب شقة محدوفة فى اخر الدنيا ٨٠ متر، لو سعر المتر مثلاً ٣ الاف وده رقم ليس له وجود فى الوجود
٨٠ متر فى ٣ الاف جنية = ٢٤٠ الف جنية
شوف بقى انت بتحوش كام فى السنة واقسم الـ ٢٤٠ الف جنية على الرقم الى هتعرف تحوشه وانت تعرف محتاج كام سنة عشان تجيب الشقة.
بعد متجيب الشقة هتبدء تاخد خطوه الجواز الاسطورى الى هيحققلك السعادة اللامتناهية فى الدنيا، المهم هتروح تطلب ايد صاحبة الصون والعفاف من ابوها، برضو بناءاً على معتقاداته وشخصيته هيتشرط ويطلب منك حاجات قد كده، كله كوم والنيش كوم.
النيش اسطورة كل بيت مصرى قديم وحديث، ليه يكون فى الصالة اصلا وليه بنتعامل معاه على انه قطعة ديكور، وليه مسيطر على حياتنا كده، ده بيتحكم فى البيت اكتر من حماتى، ده فيه جوازات بتبوظ بسببه، ليه؟ ها ليه؟
طبعاً محتاجلك فى المتوسط ١٠٠ الف باسعار دلوقتى عشان تاخد الخطوه التانيه وتتجوز ويتقفل عليك باب مع البنت الى بتحبها، روح برضو اعمل حساباتك وشوف محتاج كام سنه عشان تحوش مبلغ الجواز.
لنفترض انك اتجوزت ومش عليك ولا شلن، الى هيحصل انك هتكتشف ان الرقم الى انت بتقبضه ده ولا حاجه قصاد احتياجات الجواز، انت كنت لوحدك ودلوقتى بقيتوا اتنين، كل حاجه مضروبه فى اتنين، وربنا يكرمك ومراتك تبقى حامل، خد عندك بقى زيارات للدكتور وعلاج ومتابعة لحد متيجى للشهر التاسع، فى خلال المده دى انت بتحوش مبلغ الولادة، الى هو مثلاً ٥٠٠٠ جنية، وغالباً هتستلفهم، مش مهم، ربنا يكرمك والمولود يوصل بسلام ده الاهم.
البرنس لما يشرف، مستوى تانى خالص بقى، بامبرز ولبن واكل وهدوم وحركات كتير اوى، طبعاً مرتبك الى كان بتاعك انت ومراتك دلوقتى بقى بيتقسم على ٣ اشخاص وواحد فيهم هو الى ليه الاولوية، هتبدء هنا تضحى بكل حاجه عشان توفرله الى هو محتاجه، وهنا هتحس انك بقيت نسخه من ابوك وامك الى كانوا بيضحوا عشان يوفرولك الاكل والشرب واللبس، وهتفضل محبوس فى الدوامة دى للنهاية.
اوعي توصل لحد هنا وتحس بالاحباط وان مفيش امل، انا مش بحاول اقفلك من الجواز او بقولك متجيبش شقة او متخلفش بالعكس الحاجات دى جميله جداً وكده كده هتعملها، بس بنحاول نخليك تتبع طريقة اسهل وهتريحك لما تيجى تاخد اى خطوه من دول، وهي انك تفكر بالعقلية المالية.
تعالي نشوف فى عالم موازى للعالم الى انت عايش فيه، فى طفل اتولد معاك فى نفس اللحظة بس لاسرة غنية
تعالوا نتخيل السيناريو
فى اول ٢١ سنة من حياته كل الى مطلوب منه انه يتنقل من الابتدائية عشان يوصل للجامعة، الـ ٢١ سنة دول بيعيش عيشة زى الفل لان الاب والام عندهم المقدرة انهم يوفروله كل الى محتاجه عشان يكتشف مواهبه ويتطور من نفسه، هيدخل احسن المدارس الى فعلاً بتعلم مناهج محترمه، وهيدخل جامعه محترمه AUC او اى جامعة من الى هى بفلوس كتير اوى، الجامعات دى فعلاً بتؤهله انه يكون جاهز لسوق العمل.
دلوقتى هو جاهز عشان يشتغل، تفتكر هيعمل الى انت عملته او اهدافه شبه اهدافك؟
الشاب ده مش عاوز يشتغل ويحوش عشان يجيب شقة ولا عشان يتجوز، هو عنده فلوس كده كده وابوه هيساعده، فبياخد فرصه يفكر فى اهداف اكثر سمو زى انه يحقق ذاته مثلاً، فلما بيدور على شغل بيدور على وظيفة تطور من مهاراته، ولما بيشتغل مش بيشتغل عشان الفلوس بيشتغل عشان يتعلم ومش بيوقف عند العلم الى حصله من الجامعة، ده بيفضل ياخد كورسات طول الوقت.
من وهو طفل واهله بيربوه عشان يمسك الشركة الى ابوه عملها، متخيل مثلاً هيعلموه ايه؟ اكيد ازاى يدير الشركة.
تخيل ده لو عاوز يجيب شقه هيعانى؟
تخيل لو عاوز يتجوز هتقابله اى مشاكل؟
من الاخر كلمة السر هى “مشروعك الخاص” وهو ده الحل
السؤال دلوقتى تحب تكون اب غنى ولا اب فقير؟
لو عاوز تكمل فقير خليك فى طريقك ومتحاولش تغير من اهدافك انت كده زى الفل، وخليك فى المعاناه الى انت عايشها.
لو عاوز تغير الوضع ده، يبقي لازم تاخد خطوه جرئية وتتوكل على الله وتبدء مشروعك، بس قبل متبدء محتاج تحصل المعرفة اللى تأهلك للخطوة دي “اعقلها وتوكل” عشان لما تعمل مشروعك متفشلش.
طيب هتحصل المعرفة دى ازاى؟
لو مش معاك فلوس تدفعها فى كورسات، تقدر تدور على الانترنت على كورسات وفيديوهات تديك نفس المعرفه الى انت محتاجها، هتلاقى فيديوها بتتكلم عن ازاى تعمل مشروعك وفى كتب كتير كمان بتتكلم عن الادارة والمبيعات وكله، السؤال دلوقتى هتعرف منين ايه الى محتاج تتعلمه عشان تبدء مشروعك؟
احنا صممنا كورس اسمه Zero to Hero، من اسمه واضح اننا بنبدأ معاك من الصفر، تدريب عملي متكامل على تنفيذ المشروعات الصغيرة والمتوسطه، من اول تقييم أفكار المشاريع والتخطيط ليها لحد ما العجلة تدور، وخلال ده بتعرف إجراءات التأسيس والشكل القانوني الأنسب ليك ولما تبدأ هتعرف ازاي تسوق وتبيع وتقارن اللى وصلتله بأهدافك اللى خطط ليها وتقيم موقفك اول بأول، وبتعرف المشاكل اللى بتقابل معظم رواد الاعمال وازاي تعالجها وتعالج أي مشكلة اخري غير متوقعه.
كل اللي عليك انك تدخل على الكورس اللى بنقدمه هتلاقي الجزء الخاص بتفاصيل الكورس فيه كل مستوي من المستويات الـ ٦ للكورس، هتلاقى عناوين المحاضرات الأربعة، خد العنوان وروح دور على الانترنت على مصادر تقدر تساعدك، بردو ادخل على المخرجات الى فى كل مستوى واعرف المفروض تكون اتعلمت ايه من كل مستوى، وتتأكد انك الى درسته واللى قريته وصلك لنفس النتيجه بتاعتنا.
