أفضل نسبة كونفرجن بتترواح ما بين 2-4٪ من اجمالى عدد الزوار اللى بيدخلوا على الموقع، يعنى لو دخل على الموقع 100 شخص، المفروض يشترى منهم 2 لـ 4 اشخاص، وممكن محدش يشترى خالص اصلاً، ده طبيعى جداً، صعب ان حد يدخل على الموقع بتاعك ويشترى من اول مره، دائماً في حاجه في العقل اللاواعى للشخص اللى بيتصفح موقعك بتمنعه من انه يشترى!
دائماً بقول للعملاء بتوعنا انك تبقى محظوظ لو حد دخل عندك واشترى من اول مره، الحقيقة ان اى شخص محتاج يتعامل مع البيزنس بتاعك حوالى 7 مرات قبل ميشترى، واتكلمنا في النقطة دى قبل كده.
في الغالب العميل مبيشتريش وبيكون عنده سبب او أسباب لده، ده في علم المبيعات اسمه الاعتراضات، ويقصد بيها الأسباب اللى العميل بيقولها او بيفكر فيها عشان ميشتريش المنتج او الخدمة بتاعتك.
طبعاً الاعتراضات مش موجوده اونلاين بس، لا دى موجوده في البيزنس كله، أياً كان اونلاين او اوفلاين، اسأل اى حد في البيع هيقولك ان دى اكبر عقبة بتقابلهم عشان يفقلوا البيعه مع العملاء.
في اعتراضات كتير وفى طرق كتير لمعالجة الاعتراضات دى، المهم بالنسبة لاى بيزنس انه يعرف بالظبط ايه هي الاعتراضات اللى ممكن تمنع العملاء المحتملين انهم يشتروا المنتج او الخدمة.
طيب تعمل ايه؟
اولاً: لازم تعرف الاعتراضات اللى ممكن تمنع العملاء من شراء المنتج او الخدمة بتاعتك، واسهل طريقة تعرف بيها الاعتراضات هي انك تسأل فريق البيع عندك عن الاعتراضات اللى بتقابلهم وايه بالظبط اللى بيمنع العملاء انهم يشتروا المنتج او الخدمة.
ثانياً: حاول تعالج الاعتراضات دى في المحتوى اللى موجود في صفحة بيع المنتج او الخدمة، دائماً حاول تقلل او تقضى على الاعتراضات اللى عند العملاء.
