لو المشروع بتاعك مفيهوش تصنيع لمنتج، فالمقالة دى مش ليك بس ميمنعش انك تقراها برضو.
الوعى التجارى: قاعدة 2×2
القاعدة بتقول ان الشركات بتنقسم نوعين من جهة الشركة نفسها والعميل المستهدف.
اولاً: تقسيم الشركات نفسها، النوع الاول بيقدم خدمة والنوع التانى بيقدم منتج.
ثانياً: تقسيم الشركات بناءاً على العميل المستهدف، (B2B – B2C) حيث B اختصار لـ Business (الاعمال او الشركات) و C اختصار لـ Consumer، دلوقتى B2C تعتب شركات بتقدم منتجاتها او خدماتها للمستهلك النهائى، زى شركة بتوزيع منتجات العناية بالبشرة للمستهلك النهائى، والنوع التانى B2B شركات بتقدم منتجاتها او خدماتها للشركات، زى شركة بتصنيع برامج حسابية على الكمبيوتر وبتبيعها للشركات، ممكن برضو الشركات نفسها تقدم خدماتها للشركات والمستهلك النهائى، زى شركة بتصنيع اثاث مكتبى، فتبيع للشركات اثاثها وبرضو بتبيع نفس المنتجات للمستهلك النهائى.
المنتج النهائى
هو كل ما يتم تصنيعة بغرض البيع والتسويق والتصدير للافراد او الشركات، وهناك نوعين من المنتج النهائى، منتج اوخدمة، المنتج هو اى شي ملموس مثل الشاى والسكر والموبيل والملابس … الخ، اما الخدمة فى غير ملموسه مثل خدمة المواصلات الجديدة “اوبر” وخدمة برمجة المواقع للشركات … الخ.
لو هتصنع منتج ملموس (مساحة أرضيات مثلاً)
- ارسم المخطط الأولي للمنتج
- ابدأ فى تنفيذ المنتج (إثبات المفهوم – proof of concept)
- خلى العملاء المحتملين يجربوا المنتج
- اسمع رأيهم وارجع عدل المنتج
- ابدأ فى تنفيذ المنتج هندسياً
لو هتصنع منتج غير ملموس (ابلكيشن للموبايل مثلاً)
- اكتب كل وظائف المنتج
- اسأل العملاء المحتملين عن المنتج
- ابدأ فى تنفيذ المنتج (إثبات المفهوم – proof of concept)
- خليهم يجربوا المنتج
- ابدأ فى تنفيذ المنتج هندسياً
شوية نصايح ع الماشى
قبل ما تاخد اى خطوه لو هتشتغل فى سوق موجود بالفعل، بنصحك تروح تشتغل عند شركة من المنافسين على الاقل سنتين وبعدين ابقى روح ابدء مشروعك، الى هتتعلمه فى سنتين بفلوس ممكن تتعلمه ببلاش وتاخد فلوس كمان، متستعجلش.
لازم توفر على الاقل مصاريف ٦ شهور ويفضل سنه، الكلام ده مش للمشروع، ده لنفسك ولبيتك وخصوصاً لو متجوز، مراتك هتضغط عليك اكتر من ارخم مدير قابلته فى حياتك.
لو مشروعك بيقدم خدمه، انصحك بلاش تكمل، شوفلك اى منتج واشتغل فيه، الشعب ده غلبان ومش لاقى ياكل ومش هيشترى حاجه ثانوية، واحد صاحبى كان بيقولى الشعب ده عاوز اكل وشرب.
لو كل دماغك مشاريع بتقدم خدمه، حاول تفتح لنفسك سوق بره مصر، ده الى جانب مصر برضو، وخلى فى مصادر للدخل تانيه، ممكن تنوع فى اللى بتقدمه او ممكن تبيع منتج جنب الخدمة.
لو عاوز المشروع يكمل ابدأ مع فريق ميقلش عن ٣ أشخاص، وياريت يكون التخصصات مختلفه، ده هيوفر عليك وقت كتير وفلوس كمان، بس خلى بالك واختارهم صح.
اعمل حسابك هتفشل، وانت بتبدء المشروع هتبقى فاكر إن أول ما تبدأ الفلوس هتملى الدولاب، ده مش هيحصل ابدا، رؤيتك لسه محدوده، هتقع كتير، خلى نفسك طويل.
بنرشحلك شوية افلام تشوفها هتفيدك اوى فى الجزء ده
- Joy
- Jobs
- The social network
ايه اللى عليك تعمله؟
- ورينى شطارتك وخلى المكنه تطلع قماش
اكتر طريق عشان تستفيد، هو انك تقرا وتطبق عملى، حاول تعمل اللى عليك ولو وقفت قدامك اى حاجه او عندك اى استفسار … اسألنا
استنونا في الدرس الجاى بعنوان حط أساسيات البيزنس بتاعك
