بناءً على إحصائية من Moz فان 80% من الناس مش بتقرأ غير العنوان بس!
تخيل معايا كده الرقم ده، 80% مش هيقروا غير العنوان بس! ده معناه ان معظم الناس اللى هتشوف الإعلان بتاعك مش هتقرأ غير العنوان وهى دى فرصتك الوحيدة اللى ممكن تخلى الناس تكمل.
اللى بيحصل ان الناس بتقرأ اول سطر من اى اعلان وبناءً عليه بيقرروا اذا كانوا هيكملوا ولا لا، وده بيخلى علينا ضغط كبير جداً في اننا نكتب عنوان لكل اعلان بنعمله يجبر الناس انهم يكملوا الإعلان للآخر.
قولنا وبنقول وهنقولها دائماً ان الهدف الاساسى للإعلان ان الناس تاخد الأكشن اللى انت عاوزه، وعشان الناس تاخد الاكشن ده لازم يقروا الإعلان وعشان يقروا الإعلان لازم تكتب عنوان يجبرهم على ده.
الحقيقة المره بقى ان محدش هيقرأ اعلانك الا لو العنوان قدر يلفت انتباهه، ويجبره يكمل قراية للآخر، وعشان تبيع المنتج، لازم تكون بتكتب عناوين تشد الجمهور المهتم بالمنتج او الخدمة بتاعتك، وده يعتبر واحد من اهم الاسرار فى التسويق.
العنوان يعتبر عامل اساسى فى العملية التسويقية، لانه اول حاجه العميل بيقراها وبناءً عليه بياخد القرار اذا كان عاوز يعرف اكتر عن منتجك ولا ينفض ويمشى.
خد العناوين اللى بنكتبها كمثال واللى بنبقى حريصين جداً واحنا بنكتبها انها تشدك عشان تقرأ المحتوى بتاعنا واللى اتحقق لو وصلت للجزء اللى بتقرأه دلوقتى.
انت كمان لازم تبدء تطبق الطريقة دى وتكتب عناوين لاى محتوى عندك بنفس الطريقة اللى تضمن ان الناس اول متشوف اعلانك تدخل على طول عشان تعرف اكتر.
فى اربع عناصر لازم تحطهم قدامك دايماً وانت بتكتب العناوين:
- يشد انتباه اللى يقرأه
- يقابل توقعات العملاء
- بيركز على مشاكل العميل
- منطقى
أزاي تكتب عنوان صح في 5 خطوات:
- حدد الهدف من المحتوى
- بعد متخلص المحتوى خالص اكتب اكتر من عنوان
- ركز ان العنوان يوضح الفائدة من المحتوى
- اختار العنوان اللى شايفينة مناسب للعميل اكتر
- اتأكد ان الاربع عناصر اللى اتكلمنا فيهم متوفرين
