مفيش حد شغال في التسويق يقدر يجزم بان دى الطريقة الصح للتسويق لمنتج ما، اه في شوية ثوابت، بس الثوابت دى كانت نتيجة لعشرات الاختبارات، عشان كده لازم تعتمد بشكل كبير على اختبارات A/B عشان تحدد ايه الاختيار الأفضل للوصول لافضل كونفرجن.
اختبارات A/B هي طريقة لاختبار رسالتين مختلفتين في نفس الوقت لمعرفة ايهما افضل، مثال على ده لو عندك عرضين للقيمة اللى بتقدمها للعميل زى ماتكلمنا في الفقرة الثانيه، فهتعمل صفحتين A/B في الصفحة A هتحط عرض القيمة الأول وفى الصفحة B هتحط عرض القيمة الثاني وبعدين برنامج الاختبار هيبعت نص الزيارات للصفحة A والنص التانى للصفحة B وبناءاً على النتيجة دى هتقدر تحدد انهى عرض قيمة افضل من التانى بناءاً على معدل الكونفرجن الناتج عن كل صفحة.
تقدر تعمل اختبارات A/B لحاجات كتير زى النصوص والصور والألوان … الخ، تقريباً اى حاجه في الصفحة عاوز تختبرها اعملها A/B Test.
اولاً: ايه هي الحاجات اللى محتاج تختبرها؟
- العناوين الرئيسية
العنوان يعتبر عامل اساسى فى العملية التسويقية، لانه اول حاجه العميل بيقراها وبناءاً عليه بياخد القرار اذا كان عاوز يعرف اكتر عن منتجك ولا ينفض ويمشى واتكلمنا بالتفصيل عن العنوان في بوست سابق.
ديفيد أوجيلفي قال ان في المتوسط الناس اللى بتقرأ العناوين مقارنة بالناس اللى بتقرأ باقى النصوص 5:1 وده معناه انك لو مبعتش المنتج بتاعك في العنوان فانت بتهدر 80٪ من فلوس الإعلانات بتاعتك.
اكتب اكتر من عنوان وركز دايماً انها تكون واضحة وتشد انتباه اللى يقرأه ولازم تكون بتركز على مشاكل العميل، بعد متكتب العناوين اختار افضل اتنين واعملهم اختبار عشان تشوف الأفضل.
- العرض:
العرض اللى بتقدمه للعميل من خصم او اى عرض تانى، وطريقة شرح وعرض تفاصيله العرض ده تقدر تعمل اكتر من عرض وتعملهم اختبار.
- زرار الطلب:
واحد من اكتر العوامل المؤثرة في الكونفرجن، عناصر كتير اوى تقدر تختبرها زى شكل وحجم ولون زرار الطلب، او ممكن تجرب اكثر من زرار للطلب ضد زرار واحد.
- تصميم الصفحة:
وبيشمل تصميم الصور والألوان والخطوط وحجمها وترتيب العناصر المستخدمه في الصفحة حتى الوصول الى الكونفرجن المطلوب.
- الـ Call to action
فكر فيه بنفس الطريقة دى، الـ Call to action هو الكوبرى بين المكان اللى العميل متواجد فيه والمكان اللى عاوزه يروحلة.
الـ Call to action هو اللى بيحرك العميل.
ادخل دلوقتى على الفيسبوك هتلاقى الناس بتعمل اكتر من Call to action زى انه يقوله اتصل بالرقم ده او ابعتلنا رسالة على الصفحة او ادخل على الموقع وشوف المنتجات واشتريها.
اعمل اكتر من Call to action وبعدين اختار افضل اتنين واختبرهم وشوف انهى الأفضل.
- إضافة او حذف الفيديوهات
لو عندك فيديو بيشرح او بيعرض المنتج بتاعك جرب نسخه بالفيديو ونسخة من غير الفيديو وشوف الأفضل.
ثانياً: ايه هي برامج الاختبار اللي تقدر تستخدمها؟
في برامج كتير في منها المجانى والمدفوع، لو انت مبتدء فانت مش محتاج تدفع اى فلوس، تقدر تستخدم اللى بتقدمه جوجل وهو مجانى 100٪.
اهم حاجه انك تعمل تجربه واحده بس في نفس الوقت وبعد متخلص انقل على التجربه اللى بعدها عشان لو عملت اكتر من اختبار النتائج مش هتكون منطقية والتغيير هيضرك اكتر مينفعك.
في السر الجاى هنتكلم عن ازاى تقدر توفر للعميل المعلومات اللى عاوزها.
تابعنا…
