الـ Call to action هو زرار بيوجه العميل انه ياخد خطوة او اكشن معين، وهو اى زرار بتدوس عليه عشان تنجز مهمه معينة زى زرار الشراء على مواقع التجارة الإلكترونية.
عشان تفهم اكتر وتقدر تحقق الاستخدام الأمثل من الـ Call to action فكر فيها بالطريقة دى الـ Call to action هو الكوبرى بين المكان اللى العميل متواجد فيه والمكان اللى عاوزه يروحلة.
زى مقولنا واحنا بنتكلم عن رحلة الشراء قبل كده، العميل بيمر بكذا مرحلة، من اول مرحلة اللى فيها بيدرك المشكلة وبعدين بتتوجد الحاجه جواه للمنتج بتاعك لحد ميشترى المنتج ده في النهاية، الحقيقة ان العميل مش بيتحرك لوحده، انت اللى بتحركة، انت اللى بتدفعة دايماً انه ياخد خطوة كمان، انت المسؤول عن قرار الشراء بتاع العميل.
خدها قاعدة الـ Call to action هو اللى بيحرك العميل.
تعالي نبص على حقيقة مهمة جداً وهى ان الهدف الوحيد للاعلان بتاعك انه يخلى الناس تاخد خطوه تانيه فى رحلة الشراء، بمعنى ان لو الهدف من الاعلان بتاعك أن العملاء يدخلوا على الموقع بتاعك او يحملوا كتاب او يسجلوا بياناتهم عندك، او يعملوا شير او يكتبوا كومنت، متطلبش منهم الا حاجه واحده بس يعملوها في الإعلان.
وخليك فاكر دايماً ان الهدف الوحيد من الاعلان هو حاجة واحدة وهى ان العميل يدوس عليه او بمعنى تانى ياخد الاكشن اللى عاوزه ياخدة.
ده بتعمله عن طريق الـ Call to action، نعيد تانى، انت المسئول عن حركة العميل فى كل مرحلة من مراحل الشراء لحد ميشترى المنتج بتاعك.
ادخل دلوقتى على الفيسبوك هتلاقى الناس بتعمل اكتر من Call to action زى انه يقوله اتصل بالرقم ده او ابعتلنا رسالة على الصفحة او ادخل على الموقع وشوف المنتجات واشتريها … الخ.
ازاى تحقق اعلى فايدة من الـ Call to action؟
- دائماً حط نفسك مكان العميل
انا كعميل لما بشوف اعلان لشركة مش بكون عارف اعمل ايه! بالاضافة طبعاً لإنى مضطر اختار من بين الـ Call to actions المختلفة اللى موجودة وهختار طبعاً الاسهل والمناسب ليا واللى ميخلنيش اشترى المنتج، وده بيرجع ان الناس كلها بتحاول تبعد دايماً عن قرار الشراء.
- استخدم Call to action واحد بس
بناءً على النقطة الأولى مينفعش تحط اكتر من Call to action وده تجنباً للحيرة اللى ممكن تحصل لو سيبتها مفتوحة، احنا عملنا تجارب كتير اوى وبنقولك ان استخدام اكتر من Call to action هيطير العميل من ايدك، لانك اول مبتحط قدام عميل اختيارات وتسيبها عليه، ياما هيختار الاسهل او هينفض ويمشى.
- استخدم Call to action واضح
زى مقولنا الهدف انك تخلى العميل يدوس على الإعلان وياخد خطوة لقدام في رحلة الشراء، فلو الإعلان بتاعك بيثير رغبة عند العميل انه يعرف اكتر عن المنتج/الخدمة بتاعتك، خلى الزرار اتعلم اكتر، لو عاوزه يشترى قوله اشترى الآن وهكذا.
- دايما حط الـ Call to action فى اخر الإعلان
الناس دايماً بتفتكر اخر حاجه ودى حاجه في علم النفس معروفة، عشان كده دايماً حط الـ Call to action اخر حاجه، واقصد هنا انك لازم تحط الاكشن اخر حاجه في الإعلان، لان بعد العميل ميخلص قراءة الإعلان بتاعك ولو انت كاتب الإعلان بشكل مظبوط، العميل هياخد الاكش اللى هتقوله عليه، وده المطلوب.
المختصر المفيد:
واحدة من الحاجات اللى ممكن تؤثر على البيزنس هى الـ Call to action لانها مسئولة عن تحويل الزوار لعملاء، ده السبب اللى بيخلينا نقضى وقت كبير جداً عشان نبنى افضل Call to action للشركات اللى بنشتغل معاها.
في البوست الجاى هنتكلم عن استخدام الـ Call to action في الموقع او صفحة بيع المنتج او المسار اللى هيمشى فيه العميل عشان يشترى منتجك/خدمتك وازاى تقدر تضاعف مبيعاتك بتغيرات بسيطة جداً على الـ Call to actions اللى بتستخدمها.
