الدرس الاول من “كورس ريادة الاعمال”
ستيف جوبز، بيل جيتس، والت ديزنى وانت بتقرأ الاسامى هيجى في دماغك على طول شركة ابل، شركة مايكروسوفت، شركة ديزنى، شركات كبيرة لشخصيات عظيمة، السؤال دلوقتى … الموضوع ابتدأ ازاى؟
الناس دول حولوا أفكار ملهاش وجود فى الوجود لمنتجات وباعوها للعالم كله، وعلى قد الفكرة مكانت ملهمه وعبقرية، الرحله من الفكرة للمنتج كانت صعبة جداً، انا مش عاوز اصعبلك الامور، خصوصاً لو بتفكر تعمل مشروع، احنا عاوزين نحط خطوط عريضة للموضوع طول الطريق عشان متتفاجأش بأى حاجه تحصل وانت بتنفذ المشروع، الى عاوزين نخرج بيه من الجزئية دى هي ان الى خلى ستيف جوبز وبيل جيتس بالنجاح ده هي الافكار العظيمة وانهم اتعلموا ووفروا الموارد الى تخليهم يخرجوا أفكارهم للنور، هو ده الى هنوفرهولك في الـ 22 بوست الجايين وده اول واحد منهم.
عاوزينك تفكر بنفس طريقة رواد الاعمال (ستيف جوبز وبيل جيتس)
السؤال المهم الى كل الناس بتسألهولنا هو ازاى الاقى فكرة مشروع زيه ستيف جوبز مثلاً؟ الموضوع سهل جداً كل الى عليك انك تدور على حاجه ناقصة في الحياة وتحاول تلاقى طريقة توفرها بيها.
الناس العاديين والى انا بسميهم عملاء المستقبل بتفكر في المشاكل بشكل سلبى، رواد الاعمال بيفكروا بشكل مختلف تماماً، كلنا بنتعامل في الحياه وبنقابل مشاكل، الفرق بين الناس العاديين ورواد الاعمال ان اى مشكله بتقابلهم وهم بيتعاملوا في الحياه بشكل يومى بتكون “فرصة” ودى تعتبر افضل طريقة تلاقى بيها فكرة مشروع، انك تدور على مشكله الناس بتعانى منها وتعملها حل، ولو سألت اى حد من رواد الاعمال الناجحين عن افضل منتج هيقولولك؟ افضل منتج هو الى بيحل مشكله عند مجموعة من الناس، لما توصل للمرحلة دى وهى انك بقيت تشوف اى مشكله فرصه وممكن تتحول لمنتج، ساعتها هتكون بتفكر زى ستيف جوبز وبيل جيتس.
الخطوة الاولى دور على الفرص فى المشاكل
قبل اى حاجه لازم يكون معاك حاجه بتسجل فيها المشاكل، انا بستخدم الموبيل لانه طول الوقت جمبى حتى وانا نايم، في ابلكيشن اسمه Evernote، ده برنامج بتسجل عليه اى نوع من الملاحظات، نصوص، او فيديو او صوت.
ادخل على Google Play ودور على البرنامج Evernote واعمله Download
كل الى عليك انك تبدء تسجل اى مشكله تلاحظها، برضو لو سمعت حد بيشتكى من اى مشكله، سجلها.
دلوقتى هتلاقى نفسك بقيت بتفكر بشكل مختلف، اى مشكله بتشوفها فرصه وهتبدء تدور على حل ليها.
رائد الاعمال الناجح هو الى بيحل مشكله للعملاء ويخلى حياتهم احسن، لو قدرت تقدم حل لمشكله كبيرة بيعانى منها مجموعة كبيرة من الناس، فانت على اول طريق البيزنس الناجح.
مثال على ده:
في سنة ٢٠١١ أيام المظاهرات وتحديداً أيام محمد محمود، ووسط الضرب، شوفت واحد صاحبى شغال مصور في جريدة مصرية، وهو بيحاول يصور الاحداث، وقد ايه معرض حياته للخطر وبعدها شوفت مشهد تانى لمصور بيتاخد منه الكاميرا وبتتكسر وكل الى كان شغال عليه طول اليوم بيروح في الهوا.
دى مشكله المصورين وخصوصاً مصورين الصحافة بيعانوا منها، خصوصاً ان الى يهمهم ان الصور دى متضيعش في حالة ان الكاميرا حصل فيها حاجه، الى فكرت فيه ساعتها كان حل عبارة عن ابلكيشن على الموبيل يقدر ياخد نسخه من الصور في نفس اللحظة الى بتتصور فيها، مش بس كده لا، ده هياخد نسخه على الموبيل ونسخه على حساب الشخص المصور على الموقع بتاعنا الى محمى بكلمة سر.
شوف بقى في كام واحد مصور حوالين العالم ممكن يستخدم المنتج ده، وفعلاً سالت صاحبى وعرضت عليه الحل ده وكان منبهر بيه وقالى ادفع اى حاجه عشان الصور بتاعتى متضييعش، وبردو سالت ناس كتير مصوريين كنت بقابلهم أيام المظاهرات، وكلهم قالوا نفس الكلام، ندفع اى رقم عشان يتعمل منتج زى ده.
دى نفس الطريقة الى عايزينك تبص بيها على المشاكل، متختارش تكون حد بيعانى من المشاكل وبس، شوف المشاكل فرص.
الخطوة التانيه انك تعرف مين هو العميل بتاعك؟
معظم الناس بتفكر ان العميل بتاعهم هو الشخص الى بيدفع تمن الخدمة او المنتج، ده حقيقى، بس ده مش معناه ان الشخص الى بيستفاد من الخدمة هو الشخص الى بياخد القرار.
لو عندك حضانة، تفتكر العميل بتاعك مين الاهل ولا الطفل؟ في الحالة دى الخدمة هتتقدم للأطفال بس الى هياخد القرار هم الاهل، فهمك للعميل هيساعدك كتير اوى في الاستهداف، يعنى لما تيجى تعمل اعلان مش هتعمل عشان يشوفه الأطفال.
الخطوه التالته اكتب المشكله والحل على ورقة
ده هيساعدك في تطوير رؤيتك تجاه المشكله او الحل، طول مهى مكتوبه قدامك هتفضل تفكر فيها واى حاجه جديدة هتخطر على بالك هتلاقى نفسك بتغير في الى كتبته، وبكده تكون اخدت اول خطوه في طريق النجاح.
ايه اللى عليك تعمله؟
- فكر فى المشاكل الى بتقابلك خلال اليوم، واقعد مع الناس واسمع مشاكلهم
- دور على الفرص فى المشاكل دى وشوف هتحلها ازاى
- اكتب المشكله والحل على ورقة
اكتر طريق لتحقيق الاستفادة هو انك تقرا وتطبق الى قريته على الحياه العملية، حاول تعمل اللى عليك ولو وقفت قدامك اى حاجه او عندك اى استفسار … اسألنا
استنونا في الدرس الجاى بعنوان ازاى تفهم السوق بتاعك؟