المقصود بالترافيك هو الناس اللى بتشوف المحتوى اللى انت بتعملة، ممكن يكون اعلان ممكن يكون صفحة بيع منتج على الموقع بتاعك … الخ.
في نوعين من الترافيك:
الأول: ترافيك تقدر تتحكم فيه
وهو الترافيك اللى بيجي من الإعلانات اللى بتعملها على الفيسبوك او جوجل او اى قناة تسويق تانيه.
الثاني: ترافيك متقدرش تتحكم فيه
وهو الترافيك اللى بيجى بشكل طبيعى، وفى الغالب بيجى من الأنشطة التسويقية اللى بتوصل المحتوى بتاعك بشكل مجانى، زى انك تظهر على جوجل او تعمل بوست على الفيسبوك وناس تعمله لايك او شير ويظهر قدام ناس مش انت اللى محددهم … الخ.
مصادر الزيارات هي اول حاجه بنبص عليها لما بنشتغل على تحسين الكونفرجن، وغالباً النوع الأول من الترافيك هو اللى بنقدر نحسنه، لأننا بنقدر نعدل فيه من كل الجوانب اياً كانت محتوى او استهداف.
في قاعدة مهمة جداً ناس كتير بتهملها فيما يخص الاستهداف وهى انهم بيشوفوا ان كل الناس عملاء ليهم، وده بيوقعهم في مشكله كبيره جداً لانهم بحاولوا يستهدفوا كل الناس في الإعلانات اللى بيعملوها وده بيخسرهم فلوس كتيره جداً.
وطالما اتكلمنا عن الاستهداف يبقى لازم نتكلم على حاجة مهمة جداً.
لازم تفرق بين جاتين مهمين جداً (الفئة المستهدفة والعميل المثالى)
الفئة المستهدفة هى اى عميل ممكن يحتاج المنتج بس مش شرط يكون قادر يدفع تمنه، كل الناس مثلاً محتاجه عربية بس مش كل الناس تقدر تشترى عربية وينطبق المثال على اى نشاط بقى.
العميل المثالي هو العميل اللى محتاج المنتج وقادر يدفع تمنه.
طول الوقت ركز على انك تستهدف العميل المثالى، ليه؟ ببساطه لانه هيوفر معاك كتير اوى وهتبيع اكتر!
لازم تركز انك تحدد بالظبط وتتبنى على ده شكل العميل المثالى اللى انت عاوزه وتحدد مواصفاته بالتفصيل، من سن ونوع وجنس … الخ.
تانى حاجه ومتقلش أهمية عن النقطة الأولى هي:
العميل ده موجود فين؟
ممكن يكون موجود على الفيسبوك او جوجل او لينكدان او مش موجود اونلاين من الأساس واشك في ده.
لو حددت العميل المثالى ليك بالشكل المظبوط وعرفت هو بيتواجد فين، اضمن لك ان الباقى كله سهل، لكن لو معرفتش تحدد مين العميل الصح وموجود فين، فكل اللى جاى هيكون صعب ان مكانش مستحيل.
وده السبب الاساسى لية الكونفرجن مش تمام.
لازم تعرف ان اى تغيير بسيط في الاستهداف بتاعك ممكن يؤثر بشكل فعال جداً في تحسين الكونفرجن ولازم برضو تعرف ان معدل الزيارات اللى هيجى من جوجل غير اللى هيجى من الفيسبوك ومواقع السوشيال ميديا.
الناس بتستخدم السوشيال ميديا عشان تنبسط مش عشان تشترى ودى حقيقة مهمة جداً، فلو بتعتمد على السوشيال ميديا كمصدر للزيارات لازم تعرف ان معدل التحويل هيكون ضعيف جداً مقارنة بمعدل التحويل لو بتعتمد على الزيارات من جوجل.
وده ياخدنا لنقطة مهمة جداً وهى ٣ أنواع من الترافيك:
- عميل جاهز للشراء
- عميل غير جاهز للشراء
- عميل غير مهتم باللى بتبيعه
كنا اتكلمنا في أنواع الترافيك في بوست قبل كده تقدر ترجعله.
كل عميل من دول ليه طريقة في الاستهداف مختلفة وبرضو لازم تستهدفه برسالة مختلفه على حسب جاهزيته للشراء.
دول 5 خطوات عشان تتأكد ان الزيارات اللى جايالك لعملاء ممكن يشتروا
- اول جمله لازم تعرف الإعلان ده موجه لمين
- اعمل اعلان في المكان اللى بيتواجد فيه العميل بتاعك
- خلى الرسالة مناسبة لنوع العميل والمكان اللى بتعلن فيه
- ركز على المشاكل اللى بيعانى منها العميل
- خلى الـ Call to action واضح في الإعلان
قولنا وبنقول وهنفضل نقول الهدف الأول والأخير من الإعلان بتاعك انه يخلى الناس تاخد اكشن واحد وهو انهم يدوسوا عليه، معظم الناس بتغلط وبتحاول تبيع من الإعلان نفسه، ده بيخسرك فلوس كتير اوى، والسبب يرجع لان مش كل الناس هم الفئة المستهدف ومش كل الناس جاهزة تشترى.
عشان كده بعد متعمل اى اعلان او تكتب اى محتوى، حط نفسك مكان العميل وشوف لو انت فعلاً عندك الحاجه وعاوز تشترى المنتج هل ممكن تدوس على الإعلان ده.
لو الاجابه اه فانت خلصت اول مرحلة في تحسين معدل الكونفرجن وجاهز تدخل على المرحلة اللى بعدها.
في الخطوة الجاية هتتعلم ازاى تخلي القيمة اللي بتقدمها واضحة ومقنعه للعميل
