ليه لازم تفضل حاطط عينك على المنافسين؟ ومين المنافسين ليك اصلاً؟ لو انت شغال فى السوق فأكيد تعرف مين المنافسين بتوعك، عمتاً عاوزين 3 منافسين ليك عشان تركز معاهم.
الـ 3 منافسين دول لازم يكونوا بيبيعوا نفس المنتج وليهم تواجد اونلاين وبيعملوا إعلانات على الفيسبوك على الأقل عشان هو ده المكان اللى معظم الشركات متواجده فيه في مصر.
فى نوعين من المنافسين:
الاول: المنافس المباشر، ودول شركات بتبيع نفس الى انت بتبيعه.
الثاني: المنافس الغير مباشر، ودول شركات بتبيع منتجات بديلة للمنتجات بتاعتك.
البحث البسيط ده هيخليك تعرف تعمل اعلان صح مبنى على المعلومات اللى هتجمعها من المنافسين واللى بيها تقدر تبنى ميزة تنافسية ليك تصعب المنافسة على اى شركة تانية.
الخطوة الأولى: انت محتاج تحدد اكثر 3 منافسين ليك:
- حدد 3 كلمات بحث ليهم علاقة بشركتك او منتجك
- ادخل على جوجل ودور بالكلمات دى وشوف مين الشركات اللى هتظهرلك
- حدد اكثر 3 شركات يعتبروا منافسين ليك
- هات صفحات الفيسبوك بتاعتهم
زى مقولنا الـ 3 منافسين لازم يكونوا بيبيعوا نفس المنتج وليهم تواجد اونلاين وبيعملوا إعلانات على الفيسبوك.
الخطوة الثانية: جمع المعلومات
بعد محددت الـ 3 منافسين المنافسين ، عاوزين نشوف الإعلانات اللى شغالة دلوقتى عند المنافسين عشان عشان نشغلها.
وهتعمل الآتى:
افتح اللينك ده
https://www.facebook.com/ads/library
- اكتب اسم صفحة الشركة على الفيسبوك
- افتح ملف وورد وانقل الإعلانات بالصور بتاعتها
هتعمل ايه بالمعلومات اللى جمعتها؟
المعلومات دى هتوضحلك المنافسين شغالين ازاى؟ ايه الاستراتيجية بتاعتهم؟ بيعملوا إعلانات عامله ازاى ايه؟ ايه الميزة التنافسية اللى بيعتمدوا عليها؟ بيستهدفوا مين؟ ومن التعليقات بتاعت الناس تقدر تحدد ايه اللى ناقص والناس بتسال عليه؟
🎯 المختصر المفيد:
أجمل ما في الموضوع ده إنك لو عملت زي الشركات دي بالضبط هتوصل لنفس النتيجة بتاعتهم وده افضل من إنك تعمل اعلان من غير متدرس المنافسين اصلاً، بس لو عاوز الأفضل متقلدش حد، انت تدرسهم كويس وتعمل شغل مخصوص ليك، على الأقل خالص خد المعلومات دى وروح طبق الاستراتيجية اللى اتكلمنا عليها قبل كده في البوست ده.
خليك فاكر، عينك عليهم ومتقلدش حد.
