لو عندك محل بتبيع في اى حاجه وعميل دخلك، في حاجتين بتحصل الأول انك بتعرض المميزات بتاعت المنتج والتانى بتجاوب على كل أسئلة العميل.
اونلاين ده مش بيحصل، انت المفروض بتتخيل التجربه هتمشى ازاى وتبنيها بحيث ان العميل لما يدخل على صفحة المنتج يلاقى كل المعلومات اللى بيدور عليها من غير ما يحتاج انه يتصل بيك.
عشان كده لازم تجاوب على كل أسئلة العميل، مينفعش عميل يدور على معلومة وميعرفش يوصلها او ميلاقهاش، لازم صفحة بيع المنتج او الخدمة توفر إجابات لكل الأسئلة اللى ممكن تيجى في دماغ العميل.
تعالا نفترض انك بتبيع اثاث منزلى وفى منتج عاوز تبيعه وليكن سرير أطفال.
الطريقة الأولى:
سرير أطفال مودرن ابيض
السعر 2000 جنيه
الطريقة الثانية
سرير أطفال مودرن دورين ابيض مصنوع من خشب MDF ألماني مناسب لسن 0 حتى سنتين.
يوجد 3 ادراج لتخزين الملابس والألعاب.
المواصفات الفنية:
- الطول = 100 سم
- العرض = 70 سم
- الارتفاع = 100 سم
- اللون = ابيض، اسود
السعر 2000 جنية
ضمان استرداد 14 يوم من تاريخ الاستلام.
السؤال دلوقتى: ايه المنتج اللى هيحقق مبيعات اكبر؟ الثاني طبعاً
لازم تحط وسائل التواصل مع قسم المبيعات في صفحة بيع المنتج، لان ممكن المعلومات متكونش كافية، وده منطقى انت لو لاقيت معلومات ناقصه وعاوز تسأل عليها هتدور على رقم تليفون تتصل بيه، عشان كده لازم توفر كل وسائل التواصل بقسم المبيعات عندك، وخليه ظاهر وواضح.
حاجه اخيره بقي مهمه جداً هي انك دائماً لازم تعدل وتزود معلومات وتشيل معلومات من صفحة بيع المنتج بناءً على استفسارات العملاء اللى بتيجى بخصوص المنتج ده.
