لو انت الشركة الوحيدة اللى بتبيع منتج معين، فانت محظوظ جداً، بس الحقيقة ان ده نادر جداً ودايماً هتلاقى شركات كتير جداً بتبيع نفس المنتج.
السؤال المهم دلوقتى: ليه العميل يشترى منك مش من المنافسين؟ لو افترضنا إنك بتبيع منتج، والسعر ثابت لان السوق بيتحكم شوية فى الاسعار ومش هتعرف تنزل الاسعار كاستراتيجية، هتعمل ايه؟
المتعارف عليه فى السوق ان السعر هو الى بيبيع، واللى بيقدم اقل سعر هو اللى بيبيع اكتر، فهتلاقى كل الناس بتحاول تبيع للعملاء بالسعر القليل وممكن يقدموا خصومات كمان على السعر القليل اللى بيقدموه.
متخيل العميل اللى هيشترى منتجك بيشوف كام عرض لنفس المنتج بكام سعر مختلف؟! ايه اللى ممكن يخليه يسيب العروض بتاعت المنافسين ويجيلك؟ تفتكر السعر؟
تقريباً كل الشركات بتركز على تقديم سعر اقل للمنتج ومش هنقدر ننكر انهم بيبيعوا فعلاً، بس مش السعر هو الحاجه الاساسية اللى الشركات بتبيع بسببها، شركة زى ابل بتبيع منتجاتها باسعار عالية جداً مقارنة باسعار السوق كله؟ السؤال ليه الناس بتشترى منتجاتها؟
بسبب ان طريقة عرض أبل لكل منتجاتها مختلفه عن السوق كله، ادخل على اى منتج على موقعهم وشوف بيعرضوه ازاى! ده نفس اللى عاوزينك تعمله لمنتجاتك.
ازاى تعمل عرض ميتقاومش في 3 خطوات بس؟
الخطوة الاولى: اكتب كل خصائص المنتج وبعدين حولها لمنافع
معظم الناس بتكتب المواصفات الفنية للمنتج في العرض، بس الحقيقة ده ميهمش العملاء اوى، اللى يهمهم هو المنفعة اللى هتعود عليهم لما يشتروا المنتج ده، مثلاً الكورس اللى احنا بنقدمهولك بيخليك تضاعف مبيعاتك خلال 90 يوم، دى المنفعة اللى هتعود عليك بعد متخلص الكورس.
الخطوة الثانية: جهز العرض بتاعك
لاننا بنشتغل اونلاين ولان العميل بيكون لوحده وهو بيشترى وعشان متخسرش اى عميل يدخل على الموقع بتاعك لازم اى عرض تعمله يكون بيوفر معلومات كامله للعميل، اى عرض لازم يجاوب على 4 اسئلة رئيسية وهم: بتبيع ايه؟ السعر كام؟ مين اللى ممكن يشترى المنتج ده؟ ازاى يشتريه؟
الخطوة الثالثة: اكتب محتوى العرض
معرفش اذا كنت سمعت عن الـ Elevator pitch ولا لا، هي حاجه فى الإدارة بتقول لو انت طالع مع شخص فى اسانسير وعاوز تعرض عليه حاجه فى خلال 30 ثانية هتقوله ايه؟ الكلام اللى هتقولهوله هو الـ Elevator pitch
المطلوب منك توصل الفكرة بجمله قصيرة وبسيطة جداً بعيداً عن التعقيدات بتاعت المصطلحات اللى يفهمها بس الناس اللى شغالة فى المجال.
دى نفس الطريقة اللى هتصيغ بيها العرض بتاعك، هتكتب جمله او جملتين ميزدوش عن 140 حرف، بشكل مبسط خالص ومن غير اى تعقيد.
ازاى هتعمل ده؟
تخيل دلوقتى انك معاك عصاية سحرية وتقدر تعمل بيها اى حاجه! عاوز تكتب ايه اللى ممكن تعمله للعميل بتاعك بالعصاية السحرية دى؟ ايه اكتر حاجه ممكن توعده بيها والعصاية السحرية هتساعدك؟
لو هنضرب مثال علينا ممكن نقول: صمم موقع واظهر على جوجل فى خلال 4 ساعات فقط، او هنرجعلك فلوسك.
طبعاً الكلام اللى كتبته ده مستحيل تحقيقة ومفيش حد على الارض يقدر يعمله، المطلوب منك دلوقتى انك تعيد صياغة الكلام ده بحيث انه يكون حقيقى والوعد اللى فيه تقدر توفى بيه.
نفس المثال بعد التعديل: صمم موقعك واظهر على جوجل فى خلال 90 يوم فقط او هنرجعلك فلوسك.
خدها قاعدة في البيزنس، مينفعش تحت اى ظرف من الظروف توعد عميل بحاجه انت متقدرش تقدمهاله، عشان كده لازم دايماً تقول الكلام اللى انت تقدر عليه.
🎯المختصر المفيد:
لازم تعرف انك مش هتبيع لمجرد انك بتظهر للعميل بتاعك، في ناس كتير اوى هتشوف اعلانك ومش هتشترى، ده ليه أسباب كتير بس الأساس هو طريقة عرضك للمنتج بتاعك.
المشكله دى معروفه عندنا فى التسويق باسم Lack of converting وهو أن العرض بتاعك بيشوفه عملاء انت عارف انهم محتملين وعندهم القدرة الشرائية بس مش بيشتروا.
عشان تحل المشكلة دى لازم تفهم العميل محتاج ايه بالظبط وتقدمهوله في شكل عرض يقنعه انه أفضل عرض موجود فى السوق وانه لازم يشتريه دلوقتى حالاً.
ده مش معناه انك تكذب في الإعلان، لا احنا عاوزينك تضيف فعلاً قيمة
حقيقة للعميل! لازم العميل يشوف عرضك مختلف.
فى حاجات كتير اوى بتتعمل فى العرض عشان تقدر توصل للعميل القيمة الحقيقية للعرض بتاعك وتقنعه انه يشتريه، ده طبعاً فى حالة انك فاهم بالظبط هو محتاج ايه وعارف انه عميل محتمل جاهز للشراء.
