كله بيسأل على السعر والتفاصيل ومحدش بيشترى!
الفيسبوك بيستخدمه حوالى 3 مليار شخص شهرياً، لو عملت اعلانات قبل كده على الفيسبوك هتعرف ان الاربع أنواع العملاء الأربعة اللى اتكلمنا عليهم امبارح كلهم موجودين على الموقع.
خلال الاستشارات اللى بنعملها للشركات، ناس كتير بتشتكى انها مش عارفه توصل للعميل بتاعها او بمعنى تانى العميل بتاعها مش موجود على الفيسبوك زى مبيقولوا!
انا بشوف الكلام ده مش منطقى بالمره، الا لو بتبيع منتج لكائنات فضائية ساكنة ع المريخ مثلاً.
خدها قاعدة أساسية وانت بتعمل إعلانات على الفيسبوك “كل الناس موجودة على الفيسبوك”
اه ممكن تكون الفئة اللى انت بتستهدفها محدده وصغيرة جداً وصعب تعمل اعلانك هناك لان في النهاية تكلفة الوصول للعميل ده على الفيسبوك اعلى بكتير من تكلفة الوصول بطرق تانية كتير لكن كله موجود.
دلوقتى عشان نحدد المشكلة الحقيقية اللى بيعانى منها الشركات لازم نفهم أنواع العملاء الموجودين على الفيسبوك.
بص يا سيدى في 3 أنواع من العملاء:
عملاء جاهزين للشراء
وبتترواح نسبتهم من 2٪ الى 4٪ وبيكونوا عارفين المشكله اللى عندهم و بيدوروا على الحل المناسب، وغالباً بيكونوا موجودين على جوجل، لكن ده ميمنعش انهم موجودين على الفيسبوك برضو وتقدر تستهدفهم من عليه.
دول النسبة اللى انت والمنافسين بتوعك بتحاولوا تبيعولهم على الفيسبوك، الناس دى في الغالب مش بتسأل على الفيسبوك، بيتصلوا بيك على طول او بيبعتوا على رسائل الصفحة.
عارفين المشكلة بس مش جاهزين للشراء
نسبة العملاء اللى من النوع ده بتكون حوالى 26٪ ودول بيكونوا عارفين المشكله اللى عندهم بس لسه مش بيدوروا على الحل ليها وغالباً بيكونوا موجودين على الفيسبوك، واغلبهم بيسألوا عن السعر والمواصفات … الخ.
ودول الناس اللى بتسأل على التفاصيل والسعر، ناس عندهم المشكله اللى منتجك بيحلها، بس لسه مش جاهزين للشراء.
مش عارفين المشكلة من الاساس
ودول النسبة الأكبر من السوق 70٪، تخيل انت بقي 70٪ من العملاء المحتملين ليك مش عارفين اصلاً انهم محتاجين المنتج بتاعك!
لسه مستغرب ليه الناس مش بتشترى منك؟
المختصر المفيد
معظم الشركات اللى بتعمل إعلانات على الفيسبوك بيشتكوا من ان المبيعات ضعيفة جداً مقارنة بالميزانية اللى بتتصرف على الاعلانات دى.
طبعاً فى اسباب كتير ورا المشكله دى، لكن المشكله الاساسية هى عدم معرفة طبيعة الناس اللى على الفيسبوك، وده تقدر تختبره دلوقتى حالاً.
ادخل على الفيسبوك وقلب فى الصفحة الرئيسية هتلاقى كل الشركات بتحاول تبيع بس للنسبة اللى جاهزه تشترى، وده مش غلط، ومش صح، لان فى جوانب تانيه كتير للمعادلة، منها ان محدش هيشترى منك الا لو عارفك وبيثق فيك، وحاجه تانيه اساسية متنسهاش هى ان كل المنافسين بينافسوا على نفس الناس اللى جاهزين للشراء.
متبصش تحت رجلك واستهدف كل الناس.
