خدها قاعدة أساسية لو عاوز تبيع! لازم توصل للفئة المناسبة بالرسالة الصح في الوقت المناسب.
لو قدرت تحقق ده اضمن لك إنك مش هتلاحق على المبيعات من على الفيسبوك او اى قناة تسويقية تانية.
طبعاً مش هتوصل لده بين يوم وليلة، لازم تحافظ على التحسين المستمر للتلت عناصر اللى ذكرناهم غالباً الموضوع بياخد 3 شهور لحد متظبطها 100%.
تعمل ده ازاى؟
قبل ماقولك تعمل ده ازاى خلينا نوضح الناس بتعمل إعلانات ازاى على الفيسبوك حالياً، معظم الشركات بتحاول تبيع المنتجات بتاعتها بشكل مباشر على الفيسبوك، اللى هو انا ببيع كذا ودى مواصفاته ولو عاوز تشترى ابعتلنا على الصفحة او كلمنا على التليفون … الخ.
ده مفيهوش مشكله في ناس كتير بتحقق مبيعات بالطريقة دى عادى.
في المقالة اللى فات اتكلمنا عن جاهزية الناس للشراء وان نسبة 2-4% من الناس هم اللى جاهزين يشتروا ودول اللى كل الشركات اللى في صناعة ما بينافسوا عليهم.
ايه المشكله في الطريقة دى؟
بص هو في مشاكل كتير بس اهم مشكلتين ان الناس مش بيدخلوا على الفيسبوك عشان يشتروا فبطبيعة الحال لما بيلاقوا اعلان مش بيهتموا بيه وبيكملوا تصفح عادى
المشكله الثانيه ان الإعلان بيروح لناس متعرفكش أصلاً ولو فاكر انك ممكن تبيع منتج لحد ميعرفكش ومفيش ثقة بينك وبينه فمحتاج تفكر تانى!
ايه هي الطريقة الجديدة؟
هتعمل اعلان يلفت نظر العملاء ويجبرهم انهم يدوسوا عليه، فيروحوا على صفحة مصممه ومخصصه فيها كل المعلومات اللى ممكن يحتاجوها عن المنتج اللى انت بتبيعه ومن الصفحة دى تديهم حاجه ببلاش إن أمكن وتطلب منهم يسجلوا بياناتهم، وبعدين تتواصل معاهم عشان تبيعلهم المنتج بتاعك، لو مش هتعرف تعمل ده فحاول تعمل عرض يخليهم يشتروا على طول.
اللى حصل هنا ايه؟ انت بتخاطب الناس على انهم ميعرفوش اى معلومات عنك وبعدين بتتعرف عليهم وتبنى ثقة واخيراً بتبيعلهم منتجك.
تعالا بقي نوضح الاستراتيجية دى واحده واحده (اعلان ثم صفحة لعرض المنتج على الموقع ثم آلية مبيعات)
الهدف من الاعلان
هو انه يلفت نظر العملاء المحتملين ويخليهم يدوسوا عليه، مش انه يبيع منتجك او خدمتك.
الهدف من صفحة المنتج/الخدمة
هو انها تخلى الناس تثق فيك وتأخذ خطوه ثانية في رحلة الشراء، في الصفحة دي حاول تأخذ بياناتهم لان ده هيساعدك توصلهم بعد كده لانهم يعتبروا من نسبة الـ 96% اللي مش جاهزين للشراء في الوقت الحالي.
الهدف من آلية المبيعات
انها تبيع المنتج او الخدمة بتاعتك، سواء بقي هتطلب من الناس انهم يسيبوا بياناتهم عشان تكلمهم فى التليفون او من خلال انهم يشتروا على طول من الموقع بتاعك.
اللي هيوصل للمرحلة دي ويشترى منتجك من اول مره هيكون من نسبة الـ 4٪ اللي جاهزين يشتروا في الوقت الحالي.
اللي هيمشى يعتبر مش جاهز للشراء ومن نسبة الـ 96%، بس انت عارفهم دلوقتى ويعتبروا من الفئة المستهدفه.
بص خدها قاعدة، أي حد هيدخل على صفحة المنتج اعتبره من الفئة المستهدفه حتى لو مش هيشترى.
الناس اللى مشت دى هتعملها حملة تفضل شغالة عليهم بتحاول فيها تبنى ثقة بينك وبينهم وتعرفهم على خفيف خفيف كده بالمنتج او الخدمة اللى بتقدمها.
لحد ميجى الوقت المناسب ليهم ويكونوا جاهزين يشتروا، مش هيكون قدامهم غيرك بيثقوا فيه وعارفينه لأنك بقالك على الأقل 3 شهور ظاهر قدامهم.
جرب بقى تعمل اعلانات على الفيسبوك بالطريقة دي وشوف الفرق بين النتائج وقارنها مع الطريقة التقليدية اللي بتشتغل بيها، واحكم بنفسك.
