احنا كشركة تسويق عندنا القدرة اننا نبص على صفحة بيع منتج ونعرف اذا كانت بتحقق مبيعات ولا لا وايه الأسباب في كلتا الحالتين؟
ده مش بنعمله من فراغ ومجاش بين يوم وليلة، ده علم في التسويق اسمه Conversion Rate Optimization وخد مننا وقت كتير جداً عشان نوصل للنقطة دى.
قبل منتكلم عن الـ Conversion Rate Optimization محتاجين نعرف ايه هو الكونفرجن اصلاً.
الكونفرجن يعتبر اهم حاجه في البيزنس لانه الاكشن اللى كلنا بنتمنى انه يحصل، مثلاً عميل محتمل يسجل او يتصل بينا او يبعتلنا ايميل او يشترى منتج او خدمة.
كل مره يحصل فيها كونفرجن بتكون فرصة لنمو البيزنس، احنا بنشوفها كده لان مع كل كونفرجن لو حتى مش عملية بيع، فالعميل بيقرب من انه يشترى المنتج.
يعنى لما عميل يشوف اعلان ليك ويتصل بيك عشان عاوز معلومات اكتر، الاتصال ده كونفرجن بيقرب العميل من عملية الشراء وهكذا اى كونفرجن.
تخيل بقى انك بتعمل اعلان والـ Call to action هو ان الناس تتصل بيك، عملية الاتصال دى هي الكونفرجن، وعملت الإعلان و100 واحد شافوا الإعلان ومفيش الا واحد بس هو اللى اتصل، كده نسبة الكونفرجن هي 1٪، تعالا نقول ان الشخص ده اشترى مش اتصل وخلاص، يبقى من كل 100 شخص هيشوف الإعلان واحد هيشترى.
دلوقتى لو انت عاوز تبيع لـ 4 اشخاص … هتعمل ايه؟
قدامك حلين، ياما تزود فلوس الإعلانات وتوصل لـ 400 شخص والناتج هيكون ان 4 اشخاص هيشتروا بناءً على نسبة الكونفرجن وده مش مضمون، يعنى ممكن ميتحققش!
الحل الثانى هو انك تحاول تزود نسبة الكونفرجن لـ 4٪ وساعتها مش هتحتاج تزود في ميزانية الإعلانات عشان توصل لـ 400 شخص، لا انت هتوصل لـ 100 شخص بس! وهتبيع لـ 4 عملاء، العملية دى اسمها Conversion Rate Optimization.
ايه هو الـ Conversion Rate Optimizatoin؟
تحسين معدل التحويل (CRO) هو إجراءات تحسينات على العمليات التسويقية عشان تزود عدد العملاء الى بياخدوا اكشن معين، زى ان الناس تدوس على الإعلان بتاعك اكتر او يجيلك رسائل اكتر او عمليات بيع اكتر.
لو عاوزين نختصر أهمية تحسين معدل التحويل هنقول حاجتين هيوفر في ميزانية الإعلانات بتاعتك، وهيضاعف مبيعاتك بشكل متتخيلوش!
خلينا ناخد مثال عشان نفهم اكتر، مطعم بيتزا مثلاً، لنفترض انك قررت تفتح المطعم وعملت بروشور ووزعته على الناس في المنطقة اللى فيها المطعم، وحددت وقت الافتتاح الساعه 6 بالليل، والناس جات فعلاً والمكان كان زحمة جداً … بس محدش اشترى!
ليه محدش اشترى؟
الأسباب والاحتمالات كتيره، وصعب جداً تحصرها بس مش مستحيل! ممكن مثلاً الناس اللى جات المطعم مش هم الفئة المستهدفه للبيتزا، ناس بتعمل دايت مثلاً، او البيتزا غالية، او محدش قال للناس دى يلا اشتروا دلوقتى! أو … أو … أو …
السؤال دلوقتى لو انت صاحب البيزنس ده … هتعمل ايه؟
هو ده بالظبط الـ Conversion Rate Optimization وبالعربى تحسين معدل التحويل والمقصود بيها انك تخلى ناس اكتر تاخد الاكشن اللى انت عاوزه، زى في المثال بتاعنا انهم يشتروا بيتزا.
