لو عايز تعمل اعلان ممول تيك توك لأول مرة، فالمقالة دي هتمشي معاك خطوة بخطوة من حساب فاضي لحد حملة شغالة. مش هنتكلم نظري كتير، الفكرة إنك تخلص القراية وانت عارف تدوس على إيه وتختار إيه وليه.
لو عايز الصورة الكاملة الأول، اقرا الدليل الكامل لمدير إعلانات تيك توك.
ولو بتحب تشوف الكلام ده عملي على الشاشة، الفيديو ده من كورسات مرشد وركس المجانية:
قبل الحملة: 3 حاجات لازم تخلص
- حساب إعلانات: من ads.tiktok.com، ببيانات البيزنس، والعملة والمنطقة الزمنية الصح.
- البيكسل: لو هتودّي الناس على موقع، ركّب بيكسل تيك توك وعرّف حدث الشراء أو إرسال الفورم. منصات المتاجر المشهورة غالباً فيها تكامل بضغطة.
- الفيديوهات: جهّز من 3 لـ5 فيديوهات طولية على الأقل بزوايا مختلفة، عشان تختبر.
خطوات اعلان ممول تيك توك
1. اختار الهدف
من مدير الإعلانات اعمل حملة جديدة. لو عايز أوردرات من موقعك، اختار هدف التحويلات أو المبيعات. لو عايز رسايل أو بيانات عملاء، اختار العملاء المحتملين. ولو لسه البيكسل ملوش داتا خالص، ممكن تبدأ بزيارات الموقع لفترة قصيرة، بس متخليهاش هدفك الدائم.
2. إعدادات الحملة
سمّي الحملة اسم واضح، وحدد هل الميزانية هتبقى على مستوى الحملة ولا المجموعة. في البداية، ميزانية على مستوى المجموعة الإعلانية بتديك تحكم أوضح.
3. المجموعة الإعلانية
- الحدث المُحسَّن له: اختار الحدث الأقرب للفلوس اللي بيحصل بعدد كفاية. لو الشراء قليل جداً، ممكن تبدأ بحدث قبله زي بدء الدفع.
- أماكن الظهور: تيك توك، ويفضل تسيب الاختيار التلقائي لو مش متأكد.
- الجمهور: البلد والسن واللغة، وسيبه واسع نسبياً. متحطش اهتمامات كتير من أول يوم.
- الميزانية والجدولة: ميزانية يومية تكفي تجيب كام نتيجة في اليوم، وخليها شغالة على طول.
- المزايدة: ابدأ بأقصى تسليم أو أقل تكلفة، ولما يبقى عندك أرقام جرّب سقف تكلفة.
4. الإعلان
عندك طريقتين:
- ترفع الفيديو مباشرة: وتكتب النص واسم العرض ودعوة الإجراء.
- Spark Ads: تختار فيديو منشور على حسابك أو حساب كريتور أخدت منه كود إذن. ده غالباً بيبان أطبع، والتفاعل بيتجمع على البوست.
اكتب نص قصير ومباشر، واختار زر إجراء مناسب زي “تسوق الآن” أو “اعرف أكتر”، وتأكد إن اللينك بيفتح على الصفحة الصح على الموبايل.
5. راجع وانشر
قبل ما تنشر: راجع إن البيكسل مختار، والحدث صح، والميزانية مظبوطة، والفيديو مش متقصوص في المعاينة. الإعلان بيدخل مراجعة، وغالباً بيتوافق عليه في وقت قصير لو مفيش مشاكل في السياسات.
أول أسبوع: تراجع إيه؟
- اليوم الأول والتاني: اتأكد إن الإعلانات اتوافق عليها وبتصرف، وإن البيكسل بيسجل أحداث.
- بعد كام يوم: بص على معدل مشاهدة أول ثانيتين، والـCTR، وتكلفة الضغطة. الفيديوهات الضعيفة جداً اقفلها.
- آخر الأسبوع: قارن تكلفة النتيجة باللي تقدر تستحمله.
متعدّلش الميزانية والاستهداف كل يوم، لأن ده بيرجّع المجموعة لمرحلة التعلم. لو فيه فيديو شغال، زوّد عليه تدريجياً. ولو كله ضعيف، المشكلة غالباً في الكريتيف أو العرض، مش في الإعدادات. شوف كريتيف تيك توك.
الميزانية المناسبة
تيك توك بيطبّق حد أدنى للميزانية بيظهرلك وانت بتعمل الحملة، وبيختلف حسب العملة. بس متبصش للحد الأدنى كهدف. احسب الميزانية من تكلفة النتيجة المتوقعة وعدد النتايج اللي محتاجها، والطريقة مشروحة في أسعار إعلانات تيك توك.
غلطات أول حملة
- فيديو واحد بس، فمفيش حاجة تقارن بيها.
- هدف مشاهدات وانت عايز مبيعات.
- بيكسل متركب بس الحدث مش بيتسجل.
- صفحة هبوط بطيئة على الموبايل.
- إيقاف الحملة بعد يوم لأن مفيش مبيعات.
اتفرج على الشرح بالفيديو
الفيديوهات دي بتكمّل اللي قريته خطوة بخطوة:
الخلاصة
أول اعلان ممول على تيك توك محتاج تحضير قبل ما تدوس نشر: حساب مظبوط، بيكسل شغال، وكذا فيديو بزوايا مختلفة. اختار هدف بيقيس الفلوس، سيب الجمهور واسع، وراجع مؤشرات الفيديو أول أسبوع قبل ما تحكم. ولو عايز تتعلم من إعلانات الناس التانية، اقرا مكتبة إعلانات تيك توك.
لو عايز تتعلم التسويق والإعلانات بطريقة عملية، وتفهم إزاي تبيع أكتر بنفس ميزانيتك أو أقل، الكورس مجاني بالكامل ومتاح لأي حد. ابدأ مع كورس مصنع الميديا بايرز.



