زمان كانت القاعدة: أي حد زار موقعك ومشتراش، طارده بإعلان لحد ما يشتري. وكانت الحملات مليانة جماهير مخصصة ومشابهة بنسب مختلفة. النهارده المنصات اتغيرت، والخوارزمية بقت بتلاقي المشتري لوحدها أحسن من زمان، والتضييق الزيادة بقى ممكن يضرك.
في المقالة دي هنشرح إعادة الاستهداف (Retargeting)، والجمهور المخصص (Custom Audience)، والجمهور المشابه (Lookalike): يعني إيه كل واحد، وتعمله إزاي، والأهم: إمتى بنستخدمهم فعلًا عندنا وإمتى بنسيبهم.
3 أنواع جماهير لازم تفرّق بينهم
| النوع | يعني إيه | مثال |
|---|---|---|
| الجمهور المخصص (Custom) | ناس تعاملوا معاك قبل كده | زاروا الموقع، ضافوا للسلة، اتفاعلوا مع الصفحة، قايمة عملاءك |
| الجمهور المشابه (Lookalike) | ناس شبه جمهور مخصص عندك | ناس شبه اللي اشتروا منك |
| الجمهور المحفوظ (Saved) | استهداف بالبلد والسن والنوع والاهتمامات، محفوظ علشان تستخدمه بسرعة | ستات من 25 لـ 44 في القاهرة والجيزة |
الجمهور المخصص: منين بيتجاب؟
من مدير الإعلانات، الجماهير، “إنشاء جمهور مخصص”، هتختار المصدر:
- الموقع: عن طريق البيكسل. اقرا شرح البيكسل.
- قايمة عملاء: ترفع ملف فيه أسامي وتليفونات وإيميلات.
- أحداث أوفلاين: لو عندك مبيعات في محل وبترفعها بانتظام.
- الكتالوج: الناس اللي شافت منتجات معينة.
- التطبيق: لو عندك تطبيق.
- مصادر ميتا: فيديوهاتك، وحساب إنستجرام، وصفحة فيسبوك، ونماذج العملاء المحتملين.
مثال: زوار الموقع اللي مشتروش
اختار الموقع، والبيكسل، و”كل زوار الموقع”، والمدة (لحد 180 يوم). وبعدين اضغط “استبعاد” واختار الناس اللي عملوا حدث الشراء. كده عندك جمهور الناس اللي دخلوا ومشتروش. سمّيه اسم واضح، واكتب وصف لو حد تاني بيشتغل معاك على الحساب.
ونفس الفكرة على تيك توك: من الأدوات، مدير الجماهير، وفيه قايمة عملاء، وتفاعل مع المحتوى، وزوار الموقع من البيكسل (من 3 لـ 180 يوم)، ونماذج العملاء المحتملين، ومتابعين الحساب. المنصات كلها بتنقل من بعض.
الجمهور المشابه: إزاي تعمله صح
بتختار مصدر، والأحسن يكون جمهور المشترين، مش الزوار. وبتختار البلد، والنسبة من 1% لـ 10%. كل ما النسبة تصغر، الناس بيبقوا أشبه بالمصدر، والجمهور أصغر.
والفكرة الذكية هنا إنك تقسّم بدل ما تعمل جمهور واحد كبير:
- جمهور من 0 لـ 1%.
- جمهور من 1 لـ 5%.
- جمهور من 5 لـ 10%.
ليه؟ لأن لما الميزانية تكبر، محتاج الجمهور يكبر معاها. لو بتصرف ألف جنيه، تصرفها على الـ 1%. لو بتصرف 100 ألف، محتاج الشرايح الأوسع. لو بتصرف مليون، محتاجهم كلهم وأكتر.
الجمهور المحفوظ
دي الإعدادات العادية اللي بتحطها كل مرة: الأماكن، والسن، والنوع، واللغة. وفي الأماكن خلي بالك من الاختيار: “الناس اللي عايشة في المكان” غير “الناس اللي زارت المكان” غير “المسافرين”. لو بيزنس محلي، اختار اللي عايشين فيه. اقرا الجمهور المستهدف.
طيب الريتارجتنج لسه شغال؟
ده الكلام اللي مش هتسمعه كتير: إحنا مبنعملش ريتارجتنج في أغلب الحالات دلوقتي. المنصة بقت شاطرة جدًا في إنها توصل للناس اللي هتشتري، وأي تضييق زيادة بتعمله بيقلل حرية الخوارزمية، وده ممكن يضايق النتايج.
الريتارجتنج بيبقى منطقي في حالتين:
- لما يكون عندك جمهور كبير جدًا: قايمة عملاء أو زوار بمئات الآلاف. ودي حالة شركات متوسطة وكبيرة، مش أغلب البيزنس الصغير.
- متاجر التجارة الإلكترونية بإعلانات الكتالوج: دي الحالة الوحيدة اللي بنعملها بانتظام.
إزاي بنعمل ريتارجتنج الكتالوج
- حملة مبيعات، واختار الكتالوج كله.
- الميزانية أقل من 10% من ميزانية الحساب. مثلًا من 100 لـ 200 جنيه في اليوم، مهما كانت الميزانية الكبيرة.
- في الجمهور اختار “إعادة استهداف المنتجات على فيسبوك وخارجه” (الناس اللي شافوا أو ضافوا للسلة).
- اختبر المدة: 14 يوم، و30، و180. في تجاربنا الـ 14 يوم غالبًا هي الأحسن، بس ده مش ثابت، اختبر بنفسك.
- أسهل طريقة: خد حملة شغالة كويس، اعمل منها نسخة، وغيّر بس الجمهور للريتارجتنج.
الفكرة إن الإعلان يوصل للعميل مرة واتنين وتلاتة خلال فترة النسب (7 أيام)، علشان يكمّل قراره. اقرا حملات أدفانتدج بلس كتالوج.
استخدام ذكي للجمهور المخصص: تعليم الحساب
فيه استخدام مهم للجمهور المخصص غير الريتارجتنج: لو حسابك وقع أو جديد ومش لاقي جمهوره، ارفع قايمة عملاءك القدام وشغّل عليهم حملة صغيرة جنب حملاتك الأساسية. ده بيوجّه البيكسل للناس الصح. التفاصيل في مقالة البيكسل.
غلطات بتحصل مع الجماهير
- عمل جمهور مشابه من الزوار بدل المشترين.
- ريتارجتنج بميزانية كبيرة على جمهور صغير، فالناس تشوف نفس الإعلان 20 مرة.
- نسيان استبعاد اللي اشتروا من حملات الريتارجتنج.
- تكديس اهتمامات وجماهير كتير في نفس المجموعة الإعلانية. اقرا الاستهداف بالكريتيف.
الأسئلة الشائعة
أقل حجم لجمهور مخصص ينفع أشتغل عليه كام؟
المنصات بتسمح بأحجام صغيرة، بس عمليًا الجمهور الصغير جدًا بيخلّص بسرعة، والتكرار بيعلى. كل ما الجمهور يكبر، الحملة بتتنفس أحسن.
الجمهور المشابه لسه مفيد؟
مفيد كبداية وكطريقة تقسّم بيها التوسع. بس متستغربش لو الاستهداف الواسع جاب نتيجة أحسن منه، ده بقى بيحصل كتير.
أعمل ريتارجتنج لخدمة مش منتج؟
لو جمهورك صغير، غالبًا لأ. ركّز على حملة أساسية قوية بإعلانات بتعمل فلترة للعميل من الأول.
الخلاصة
الجمهور المخصص والمشابه والريتارجتنج أدوات قوية، بس مش لازم تستخدمها في كل حملة. اعمل جماهيرك من المشترين، وقسّم المشابه حسب الميزانية، واعمل ريتارجتنج كتالوج بميزانية صغيرة لو متجر، وسيب الخوارزمية تشتغل في الباقي. والصورة الكاملة في دليل إعلانات فيسبوك وإنستجرام.
لو عايز تتعلم التسويق والإعلانات بطريقة عملية، وتفهم إزاي تبيع أكتر بنفس ميزانيتك أو أقل، الكورس مجاني بالكامل ومتاح لأي حد. ابدأ مع كورس مصنع الميديا بايرز.

