أنواع المنتجات في التسويق تلاتة: منتجات يومية، ومنتجات مقارنة، ومنتجات فاخرة. ونوع منتجك هو اللي بيحدد إعلانك هيبقى شكله إيه، وهيروح على أنهي منصة، وهتكلم العميل بأنهي رسالة.
وقبل أي حاجة، الأساسيات اللي الناس بقت بتهملها هي الـ 4P’s: المنتج والسعر والمكان والترويج. كل منتج ليه مواصفات وخصائص بتميّزه، ولما بنبص على المنتجات بنقسمها تلات أقسام.
1. المنتجات اليومية
دي حاجات العميل بيشتريها بسرعة ومن غير ما يفكر. أنا عطشان، شفت سوبر ماركت، دخلت اشتريت. مش ببذل مجهود في القرار.
خصائصها:
- سعرها منخفض.
- موجودة في كل مكان.
- الترويج ليها مبيبقاش على السوشيال ميديا.
عشان كده مش هتلاقي حد بيعمل إعلان لإزازة مية على السوشيال ميديا عشان يبيعها. إحنا في البيرفورمانس ماركتنج عايزين نتيجة مباشرة، وده مش هيحصل مع منتج زي ده. الإعلانات بتاعتها بتبقى على التلفزيون.
2. منتجات المقارنة
ودي اللي بيقع فيها معظم الشركات. العميل بيقارن قبل ما يشتري: السعر والجودة والشكل والخدمة بعد البيع. زي العفش، والفاشون، والإلكترونيكس، والدكاترة والعيادات.
خصائصها:
- سعرها أعلى من المنتجات اليومية.
- العميل بياخد وقت في التفكير وبيقارن بين البراندات.
- مش بيشتريها كل يوم.
لو عايز تروح لدكتور أسنان، هتدوّر وتسأل وتقارن لحد ما تقرر، وبعدها مش هتحتاج تروح كل يوم. وده النوع اللي ترويجه بيشتغل كويس على السوشيال ميديا، سواء منتج أو خدمة أو كورس، ومعظم المنتجات اللي بنشتغل عليها بتقع هنا.
3. المنتجات الفاخرة (اللاكشري)
زي العربيات والساعات الغالية. الهدف منها إنها بتدي الناس فخامة.
خصائصها:
- سعرها عالي جداً.
- العميل مش بيقارن بين البراندات، عنده لويالتي للبراند نفسه.
- الجودة استثنائية ومالهاش مثيل، واللي بيشتروها قليلين جداً.
محدش هيشتري لامبورجيني ويقارنها بفيراري. وترويجها قصة تالتة خالص: بتلاقيه في أماكن معينة زي البيزنس كلاس في الطيارة، لأنهم عارفين إن الفئة اللي بتشتري موجودة هناك.
وأنواع العملاء كمان تلاتة
العملاء اللي بيجولنا على مدار شغلنا كله مبيخرجوش برا تلات أنواع:
- اللي بيبيع منتجات: منتج واحد زي جهاز ليزر، أو قسم كامل زي منتجات الألبان، أو متجر فيه أقسام مختلفة زي الشنط أو الإلكترونيكس أو الإضاءة.
- اللي بيبيع خدمة: زي الاستشارات والتسويق وتصميم المواقع.
- اللي بيبيع كورسات: كورس واحد، أو منصة فيها كورسات كتير.
وتحديد ده من الأول بيحدد شكل كل إعلاناتك: هتودّي الناس على منتج واحد، ولا على قسم، ولا على المتجر كله. اقرا أكتر في إعلانات المتجر الإلكتروني.
أسئلة شائعة
إزاي أعرف منتجي من أنهي نوع؟
اسأل نفسك: العميل بيفكر قد إيه قبل ما يشتريه؟ وبيقارن ولا لأ؟ والسعر قد إيه؟
هل ينفع منتج يكون أكتر من نوع؟
أحياناً، على حسب العميل. بس غالباً هتلاقي نوع واحد هو الغالب.
المنتجات اليومية مينفعش تتسوق أونلاين خالص؟
ممكن بطرق تانية، بس إعلانات البيرفورمانس على السوشيال ميديا غالباً مش هتجيب عائد معاها.
اقرا كمان: اختيار قناة البيع: العميل بتاعك بيشتري منين فعلاً؟
اقرا الدليل الكامل: التسويق الإلكتروني: الدليل الشامل من الصفر
الخلاصة
اعرف منتجك من أنهي نوع قبل ما تعمل أي إعلان، لأن ده أول سؤال في تحليل المنتج قبل الإعلان. ودي من أول الحاجات اللي بنجاوب عليها في كورس مصنع الميديا بايرز، المجاني بالكامل.
لو عاوز تتعلم الشغلانة دي صح من الأول، سجّل في الكورس مجاناً من هنا.

