احنا كشركة تسويق عندنا القدرة اننا نبص على صفحة بيع منتج ونعرف اذا كانت بتحقق مبيعات ولا لا وايه الأسباب في كلتا الحالتين؟
ده طبعاً مش بنعمله من فراغ ومجاش بين يوم وليلة، ده علم في التسويق اسمه Conversion Rate Optimization، هتعرف معناه وكل حاجه عنه بعد شوية.
الكونفرجن يعتبر اهم حاجه في البيزنس لانه الاكشن اللى كلنا بنتمنى انه يحصل، مثلاً عميل محتمل يسجل او يتصل بينا او يبعتلنا ايميل او يشترى منتج او خدمة.
كل مره يحصل فيها كونفرجن بتكون فرصة لنمو البيزنس، احنا بنشوفها كده لان مع كل كونفرجن لو مش عملية بيع، فالعميل بيقرب من انه يشترى المنتج.
يعنى لما عميل يشوف اعلان ليك ويتصل بيك عشان عاوز معلومات اكتر، الاتصال ده كونفرجن بيقرب العميل من عملية الشراء وهكذا اى كونفرجن.
تخيل بقى انك بتعمل اعلان والـ Call to action هو ان الناس تتصل بيك، عملية الاتصال دى هي الكونفرجن، وعملت الإعلان و100 واحد شافوا الإعلان ومفيش الا واحد بس هو اللى اتصل، كده نسبة الكونفرجن هي 1٪، تعالا نقول ان الشخص ده اشترى مش اتصل وخلاص، يبقى من كل 100 شخص هيشوف الإعلان واحد هيشترى.
دلوقتى لو انت عاوز تبيع لـ 4 اشخاص ... هتعمل ايه؟
قدامك حلين، ياما تزود فلوس الإعلانات وتوصل لـ 400 شخص والناتج هيكون ان 4 اشخاص هيشتروا بناءً على نسبة الكونفرجن وده مش مضمون، يعنى ممكن ميتحققش!
الحل الثانى هو انك تحاول تبيع لتزود نسبة الكونفرجن لـ 4٪ وساعتها مش هتحتاج تزود في ميزانية الإعلانات عشان توصل لـ 400 شخص، لا انت هتوصل لـ 100 شخص بس! العملية دى اسمها Conversion Rate Optimization وهى اللى هنشرحها في الكتاب ده وهنقولك على 10 اسرار واستراتيجيات بنقدر بيها نزود نسبة الكونفرجن.
ده طبعاً هيوفر في ميزانية الإعلانات الخاصة بيك وهيضاعف مبيعاتك بشكل سريع جداً.
ودى اول حاجه بنعملها لما بنشتغل على اكونت جديد، بنراجع على طرق البيع اللى بالفعل شغاله ونحسنها وبكده بنقدر نضاعف المبيعات بشكل سريع.