محدش شغال في التسويق يقدر يجزم إن الحاجة اللي عملها هي الصح وهي اللي هتجيب نتيجة. آه فيه ثوابت، بس الثوابت دي نفسها طلعت من عشرات الاختبارات. علشان كده أي قرار مهم في صفحتك أو إعلانك لازم يعدي على اختبار A/B الأول.
في المقالة دي هنشرح اختبار A/B ببساطة، وتختبر فيه إيه، وإزاي تعمله فعليًا بحملة على فيسبوك من غير أدوات مدفوعة، وإزاي تقرا النتيجة من غير ما تضحك على نفسك. والشرح من كورس تحسين معدل التحويل.
يعني إيه اختبار A/B؟
إنك تعرض نسختين مختلفتين من نفس الحاجة، في نفس الوقت، لنفس نوع الجمهور، وتشوف أنهي واحدة بتجيب نتيجة أعلى. نسخة A ونسخة B، والفرق بينهم حاجة واحدة بس.
مثال: عندك طريقتين تعرض بيهم قيمة منتجك. بتعمل صفحتين متطابقتين، وتغيّر بس العنوان الرئيسي. وتبعت لكل صفحة نفس عدد الزيارات، وتشوف أنهي صفحة جابت مبيعات أكتر.
تختبر إيه في صفحة الهبوط؟
| العنصر | أمثلة على الاختبار |
|---|---|
| العنوان الرئيسي (عرض القيمة) | عنوان بيتكلم عن المشكلة ضد عنوان بيتكلم عن النتيجة |
| ترتيب العناصر | الشهادات فوق ولا تحت؟ السعر بدري ولا متأخر؟ |
| زرار الطلب | الكلام المكتوب عليه، ولونه، وحجمه |
| التصميم العام | صفحة قصيرة ضد صفحة طويلة، بفيديو ولا من غير |
| العرض | خصم ضد هدية، شحن مجاني ضد سعر أقل |
ابدأ بالحاجات اللي ليها أكبر تأثير: العنوان والعرض. لون الزرار آخر حاجة. اقرا عناصر صفحة الهبوط واللاندينج بيج الطويلة ولا القصيرة.
إزاي تعمل الاختبار عمليًا على فيسبوك
مش محتاج أدوات مدفوعة. الطريقة اللي بنستخدمها:
- اعمل نسخة من الصفحة وغيّر فيها العنصر اللي هتختبره بس.
- في حملتك، جوه نفس المجموعة الإعلانية، اعمل نسخة من نفس الإعلان بالظبط.
- الإعلان الأول يودّي على الصفحة A، والتاني على الصفحة B. نفس الصورة ونفس الكلام، الفرق في الرابط بس.
- حدد عدد زيارات متساوي لكل صفحة، مثلًا 100 زيارة لصفحة الهبوط لكل واحدة.
المشكلة اللي محدش بيقولك عليها
الحملات دلوقتي، خصوصًا مع ذكاء المنصات، بتفضّل تعرض الإعلان اللي شايفاه أحسن، ومش هتوزّع بالتساوي. ممكن تلاقي إعلان واخد 900 زيارة والتاني 50. وده يبوّظ الاختبار.
الحل:
- يدوي: تابع، وأول ما إعلان يوصل للعدد المحدد (100 زيارة)، وقّفه، وسيب التاني يكمّل لحد ما يوصل لنفس العدد.
- قاعدة تلقائية: اعمل قاعدة في الحساب الإعلاني توقف الإعلان أوتوماتيك لما يوصل لعدد زيارات صفحة الهبوط المحدد. اقرا أتمتة إعلانات فيسبوك.
وميتا عندها كمان أداة اختبار A/B رسمية في مدير الإعلانات بتقسّم الجمهور، وتنفع لو عايز تختبر حاجة على مستوى الحملة أو المجموعة الإعلانية.
تقرا النتيجة إزاي؟
- قارن معدل التحويل مش العدد بس: المبيعات على الزيارات لكل صفحة. اقرا تحسين معدل التحويل.
- استنى عدد كفاية: 100 زيارة بداية معقولة لمعرفة الاتجاه. لو الفرق صغير، كمّل لعدد أكبر قبل ما تحكم.
- نفس الفترة: متقارنش صفحة اشتغلت في أسبوع العيد بصفحة اشتغلت في أسبوع عادي.
- سجّل كل اختبار: إيه اللي اختبرته، والنتيجة، والقرار. مع الوقت هيبقى عندك ثوابت خاصة بمجالك.
نفس الفكرة في الإعلانات نفسها
الإعلانات كمان بتتختبر: الهوك، والزاوية، والكريتيف، والعنوان. بس هنا إحنا بنختبر نسخ كتير مع بعض وبنسيب المنصة تختار، وبعدين نبني على الكسبان. ودي فكرة اختبار الكوبي الإعلاني ومصنع الإعلانات.
غلطات بتبوّظ الاختبار
- تغيير أكتر من حاجة مرة واحدة: لو غيرت العنوان والصورة والسعر، مش هتعرف إيه اللي فرق.
- الحكم بدري: 20 زيارة مش اختبار.
- زيارات مش متساوية: إعلان واخد أضعاف التاني.
- جمهور مختلف: كل نسخة بتروح لجمهور شكل.
- اختبار حاجات ملهاش تأثير: لون زرار والعرض نفسه ضعيف.
الأسئلة الشائعة
أعمل اختبار A/B بميزانية صغيرة؟
آه، بس اختبر حاجات كبيرة التأثير، علشان الفرق يبان بعدد زيارات قليل.
محتاج أداة مدفوعة؟
مش لازم. نسخة من الصفحة وإعلانين في نفس المجموعة وقاعدة إيقاف بيكفوا في الأول.
بعد ما ألاقي الصفحة الكسبانة أعمل إيه؟
خليها هي الأساسية، وابدأ الاختبار اللي بعده على عنصر تاني. التحسين عملية مستمرة.
الخلاصة
اختبار A/B بيحوّل قراراتك من “أنا حاسس” لـ “الأرقام بتقول”. غيّر حاجة واحدة، ووزّع الزيارات بالتساوي، واستنى عدد كفاية، وقارن معدل التحويل، وسجّل النتيجة. ولو عايز تشوف الصورة كاملة، ارجع لـ دليل صفحة الهبوط.
لو عايز تتعلم التسويق والإعلانات بطريقة عملية، وتفهم إزاي تبيع أكتر بنفس ميزانيتك أو أقل، الكورس مجاني بالكامل ومتاح لأي حد. ابدأ مع كورس مصنع الميديا بايرز.


