زوّدت ميزانية حملة شغالة كويس من 3 آلاف لـ 5 آلاف، ونمت. تاني يوم صرفت ومجابتش نتيجة، واليوم اللي بعده نفس الكلام. كده صرفت 10 آلاف في يومين، وتكلفة البيعة اتضاعفت. السيناريو ده بيحصل كل يوم، والحل اسمه القواعد التلقائية (Automated Rules) في مدير الإعلانات.
في المقالة دي هنشرح الأتمتة اللي بنستخدمها فعلًا في مرشد وركس: إزاي تعمل قاعدة توقف حملة أو تبعتلك تنبيه أو تعدّل الميزانية، وإمتى تستخدمها، والأهم: الإعدادات التلقائية اللي لازم تقفلها.
الأتمتة بنستخدمها في إيه؟
في حالتين أساسيتين:
- التوسيع من غير تحكم: لما تزوّد ميزانية حملة وعايز تحميها لو وقعت. اقرا توسيع حملات فيسبوك.
- الاختبار: لما تختبر إعلانات أو صفحات وعايز توقف كل نسخة عند عدد معين من الزيارات. اقرا اختبار A/B.
لو الحملة شغالة بحد تكلفة أو هدف عائد، هي أصلًا محمية، فمش محتاج قاعدة عليها في الغالب.
خلي بالك من التعديلات التلقائية قبل أي حاجة
المنصة فيها تعديلات تلقائية (Automatic Adjustments) في الميزانية والتسليم والأماكن، بتعمل حاجات من غير ما ترجعلك. نصيحتنا: اقفلها كلها، ولو فتحت حاجة، افتحها لسبب وإنت فاهم هي بتعمل إيه.
وده من تجربة حقيقية: وقفنا حملة كانت بتصرف حوالي 10 آلاف جنيه، فالمنصة قررت تنقل الميزانية دي لحملات تانية شايفاها “أحسن أداء”. الحملة اللي اختارتها كانت حملة لايكات العميل كان طالبها، فصرفت حوالي 200 ألف جنيه على لايكات. موقف ميتنسيش.
إزاي تعمل قاعدة تلقائية
- من مدير الإعلانات، اختار الحملة (أو المجموعة الإعلانية أو الإعلان) اللي عايز تطبق عليها القاعدة.
- اضغط على “القواعد” ثم “إنشاء قاعدة مخصصة”.
- اختار الإجراء:
| الإجراء | بيعمل إيه | تستخدمه إمتى |
|---|---|---|
| إيقاف الحملة / المجموعة / الإعلان | يوقفها لما الشرط يتحقق | حماية من الحرق |
| تشغيل | يشغلها لما الشرط يتحقق | نادرًا |
| إرسال إشعار فقط | يبعتلك تنبيه من غير ما يغيّر حاجة | لو عايز تقرر بنفسك |
| زيادة / تقليل الميزانية اليومية بنسبة | يعدل الميزانية | التوسيع التدريجي |
- حدد الشروط: مثلًا تكلفة النتيجة أكبر من 500 جنيه. ونصيحة: خلي الرقم أقل شوية من حدك الحقيقي، مثلًا 400 أو 450، علشان القاعدة تسبق المشكلة.
- ضيف شرط مرات الظهور: مثلًا مرات الظهور أكبر من 8 آلاف. ده بيمنع القاعدة إنها تحكم بدري على حملة لسه بتبدأ ومفيهاش داتا كفاية.
- المدة الزمنية للبيانات: الأحسن “الحد الأقصى”، علشان القاعدة تقرا بيانات الحملة كلها.
- الجدولة: “باستمرار” يعني القاعدة بتتشيك كل 30 لـ 60 دقيقة، أو يوميًا في وقت محدد.
- الإشعار: اختار الشخص اللي يوصله التنبيه، والإيميل غالبًا أوضح.
- اضغط “إنشاء”.
ولازم كل الشروط تتحقق مع بعض علشان القاعدة تشتغل.
أمثلة قواعد بنستخدمها
قاعدة حماية التكلفة
- الإجراء: إيقاف الحملة.
- الشروط: تكلفة الشراء أكبر من 450 جنيه، ومرات الظهور أكبر من 8,000.
- الجدولة: باستمرار.
قاعدة حماية العائد
- الإجراء: إرسال إشعار (أو تقليل الميزانية).
- الشروط: عائد الشراء على الموقع أقل من 7 (حسب هدفك).
قاعدة إيقاف الاختبار
- الإجراء: إيقاف الإعلان.
- الشرط: زيارات صفحة الهبوط أكبر من 100.
قاعدة تنبيه بس
لو مش عايز القاعدة توقف حاجة، خليها تبعتلك إشعار لما التكلفة تعدي حد معين. تفتح التطبيق من الموبايل وتقرر إنت.
توقف الحملة ولا تقلل ميزانيتها؟
فيه كلام كتير إن إيقاف الحملة بيبوّظها. اللي شفناه: لو مش مضطر توقف الحملة، متوقفهاش. في أغلب الأوقات لما بتوقف حملة وترجع تشغلها، أداؤها بيتضرب لأسباب محدش يعرفها. ولو مضطر، زي إن المنتج خلص، قلل الميزانية لأقل حاجة بدل الإيقاف.
وحاجة غريبة بنلاحظها: لما بنقلل ميزانية حملة شغالة كويس، ساعات أداؤها بيعلى جدًا. علشان كده من الطرق اللي بنستخدمها في التحسين: ناخد الحملة الكسبانة، نعمل منها نسخة، ونوجّه جزء من الميزانية للنسخة، ونقلل ميزانية الأصلية. وده بيحسّن النتايج بشكل ملحوظ.
تعدّل القاعدة منين؟
من “القواعد” ثم “إدارة القواعد”. هتلاقي كل قواعدك، تقدر تعدلها أو توقفها. وتعديل القاعدة مش بيأثر على الحملة نفسها.
الأسئلة الشائعة
القواعد التلقائية بتكلف فلوس؟
لأ، مجانية جوه مدير الإعلانات.
أعمل قاعدة على الحملة ولا على الإعلان؟
لحماية الميزانية، على الحملة. ولاختبار الإعلانات، على الإعلان.
القاعدة وقفت حملة كويسة بالغلط؟
غالبًا الشروط ضيقة أو مفيش شرط مرات ظهور. زوّد شرط الظهور، أو خلي الإجراء إشعار بس لحد ما تتأكد من الأرقام.
الخلاصة
القواعد التلقائية بتخليك توسّع وتختبر وإنت نايم مطمن: شرط تكلفة أو عائد، ومعاه شرط مرات ظهور، وإجراء إيقاف أو إشعار أو تعديل ميزانية. واقفل التعديلات التلقائية اللي بتغيّر من غير ما ترجعلك، ومتوقفش حملة إلا لو مضطر. والأرقام اللي بتبني عليها القواعد مشروحة في مؤشرات أداء الإعلانات.
لو عايز تتعلم التسويق والإعلانات بطريقة عملية، وتفهم إزاي تبيع أكتر بنفس ميزانيتك أو أقل، الكورس مجاني بالكامل ومتاح لأي حد. ابدأ مع كورس مصنع الميديا بايرز.


