كتير من أصحاب البيزنس بييجوا يقولوا: “عايز أعمل إعلانات من النهارده”. وإحنا بنرد: “محتاجين نفهم الأول”. مش رفاهية ولا تطويل. الإعلان هو آخر حاجة العميل بيشوفها، بس وراه شغل كتير لو متعملش، الفلوس بتتصرف على الفاضي.
الشغل ده عندنا اسمه استراتيجية الخمسة أضعاف (5X). ورقة قعدنا حوالي سنة نكتبها، والميديا بايرز عندنا بيمشوا عليها خطوة بخطوة مع أي عميل. في المقالة دي هنشرحها كاملة، علشان تطبقها على البيزنس بتاعك.
ليه اسمها الخمسة أضعاف؟
الهدف من أي حاجة بنعملها في التسويق إن يكون عندنا تحكم كامل في تقسيم الميزانية بناءً على حجم المبيعات اللي عايزين نحققها، ونصرف الميزانية كلها، ونحقق عائد 5 أضعاف الصرف. يعني كل جنيه بيتصرف على الإعلانات يرجع 5 جنيه مبيعات.
ليه 5 بالذات؟ لأن أسعار الإعلانات غليت. زمان كان العائد ممكن يوصل 25 و30 ضعف، دلوقتي 5 أضعاف رقم صحي وواقعي لأغلب المجالات. وفيه استثناءات طبعًا، زي المنتجات الغالية اللي العائد فيها بيبقى أعلى. اقرا حساب العائد على الإعلانات.
المنهجية اللي ورا الاستراتيجية
قبل الأسئلة، لازم تفهم طريقة التفكير اللي إحنا بنطبقها في كل حاجة، مش في الإعلانات بس:
- حلل وادرس: افهم البيزنس والسوق والعميل.
- ابني: من التحليل بتطلع مخرجات: إعلانات، وصفحات بيع، وكوبي.
- اختبر: نزّل اللي بنيته بميزانية محسوبة.
- حسّن: اللي شغال كمّل عليه، واللي مش شغال اقتله.
- وسّع: لما تلاقي اللي شغال، زوّد عليه. اقرا توسيع الحملات.
أغلب الناس بتبدأ من الخطوة 3 على طول. علشان كده أول شهر مع أي عميل عندنا بيكون تحليل ودراسة وبناء، وبعدها الاختبار بيوصل لنتيجة أسرع ومن غير ما نحرق الميزانية.
وفيه سبب تاني مهم: التوثيق. أغلب الشركات اللي اشتغلنا معاها مفيش عندها أي حاجة مكتوبة. صاحب البيزنس بيحكي كل حاجة من دماغه. الورقة دي بتخلي أي حد جديد، ميديا باير أو وكالة أو موظف، يقراها ويفهم البيزنس كله.
السؤال الأول: هنبيع إيه بالظبط؟
سؤال شكله بديهي، بس محدش بيدخل في تفاصيله. بص على المنتج بعينين: عين صاحب الشركة، وعين الشخص اللي هيشتري.
نوع البيزنس
أغلب البيزنس بيقع في 3 أنواع:
- منتجات: متجر بيبيع منتج واحد (جهاز مثلًا)، أو قسم واحد (ألبان)، أو أقسام كتير (شنط بأنواعها).
- خدمات: شركة عندها خدمة أو مجموعة خدمات.
- كورسات أو منصات: حد بيبيع كورس أو عنده منصة بتبيع.
نوع المنتج من سلوك العميل
| النوع | العميل بيعمل إيه | أمثلة | ينفع إعلانات أداء؟ |
|---|---|---|---|
| منتجات يومية | بيشتري بسرعة ومن غير تفكير | مية، مشروبات | غالبًا لأ، دي ليها إعلانات التلفزيون |
| منتجات مقارنة | بيقارن السعر والجودة والشكل والخدمة | عفش، ملابس، إلكترونيات، عيادات | آه، وأغلب البيزنس هنا |
| منتجات مميزة (فاخرة) | مش بيقارن، عنده ولاء للبراند | عربيات وساعات فاخرة | ليها قنوات خاصة جدًا |
اقرا أكتر في أنواع المنتجات في التسويق.
قسّم المنتجات حسب قدرة العميل على الشراء
افتح موقع العميل وبص على المنتجات وأسعارها. مثلًا متجر شنط: فيه شنطة يد بـ 750 جنيه مناسبة لكل الناس، وده منتج تقدر تعمل له إعلان لوحده. وفيه منتجات تانية أنسب تتباع كقسم أو كمتجر كامل.
الهدف من السؤال ده إنك تشوف شكل الإعلانات النهائي من البداية: هنعلن عن منتج؟ ولا قسم؟ ولا المتجر كله؟ اقرا ملف وصف المنتج.
السؤال التاني: هنبيع لمين؟
هنا بنحدد العميل بدقة: سنه، ونوعه، ومكانه، ودخله، ومشكلته، والكلام اللي بيقوله عن المشكلة دي. ومش عميل واحد. المنتج الواحد ممكن يكون ليه أكتر من نوع عميل، وكل نوع محتاج إعلان مختلف.
اقرا الجمهور المستهدف ورحلة الشراء.
السؤال التالت: هنبيع فين؟
يعني القنوات: فيسبوك وإنستجرام؟ تيك توك؟ جوجل؟ والبيع نفسه هيحصل فين: موقع؟ رسايل؟ واتساب؟ مكالمة؟
القناة بتتحدد من العميل ونيته. العميل اللي بيدور على جوجل جاهز يشتري، والعميل على السوشيال ميديا محتاج تقنعه. اقرا اختيار قناة البيع وإعلانات جوجل ولا فيسبوك.
السؤال الرابع: هيشتروا مننا ليه؟
ده سؤال الميزة التنافسية والرسالة التسويقية. ليه العميل يسيب كل المنافسين ويشتري منك؟ وعلشان تجاوبه لازم تكون درست السوق والمنافسين كويس: إعلاناتهم، ومواقعهم، وعروضهم. اقرا دليل دراسة السوق والميزة التنافسية.
السؤال الخامس: هنبيع إزاي؟
هنا بنبني العرض والرحلة: السعر، والعرض، والضمان، وإزاي العميل هينتقل من الإعلان للشراء. اقرا العرض البيعي.
المخرجات: إيه اللي بيطلع من الورقة دي؟
لما تخلص الأسئلة الخمسة، هتبقى عارف بالظبط محتاج إيه:
- محتاج صفحة هبوط أو موقع؟ هتكلم المطور.
- محتاج كوبي؟ هتكلم كاتب المحتوى.
- محتاج فيديوهات وصور؟ هتكلم فريق الكريتيف.
والميديا باير عندنا هو اللي ماسك الموضوع من أوله لآخره، لأنه هو اللي عنده كل البيانات، وهو المسؤول إن الحساب يحقق الهدف.
لو إعلانات جوجل
محتاج حاجتين بس: بحث الكلمات المفتاحية، والكوبي بتاع الإعلانات. اقرا مخطط الكلمات الرئيسية.
لو إعلانات سوشيال ميديا
الإعلان النهائي عبارة عن توليفة: هوك + كوبي + كريتيف + عنوان + زرار. والتوليفة دي لازم تخلّي العميل لما يضغط يكون جاهز يشتري، مش بس فضولي.
ودي قاعدة مهمة: متعملش إعلان بيثير الفضول وخلاص. هتجيب ليدز كتير ورخيصة، بس محدش هيشتري. حط المعلومات المهمة زي السعر في الإعلان. تكلفة الضغطة هتعلى شوية، بس معدل التحويل هيبقى أحسن بكتير، والبيكسل هيتعلم إن الناس الصح هما اللي بيدخلوا. اقرا عناصر الإعلان الناجح.
والفكرة دي اتعلمناها من برامج التسوق في التلفزيون: يعرضوا المنتج، ويوروا مميزاته، ويحكوا عنه، وفي الآخر خالص ينزل العرض والسعر ورقم التليفون. اللي بيتصل بيكون جاهز يشتري.
الكريتيف بالأرقام
لكل منتج أو خدمة بنطلب من 3 لـ 5 فيديوهات بزوايا مختلفة، ومعاهم صور. ولكل إعلان بنعمل 10 هوكات و3 قفلات (قفلة للرسايل، وقفلة لصفحة البيع، وقفلة عامة). يعني 30 نسخة نقدر نختبرها. ودي فكرة مصنع الإعلانات.
الخلاصة
استراتيجية الخمسة أضعاف مش ورقة نظرية. هي 5 أسئلة بتحوّل البيزنس لخطة: هنبيع إيه، ولمين، وفين، وليه هيشتروا مننا، وإزاي. ومن الإجابات بتطلع المخرجات: صفحات، وكوبي، وكريتيف، وكلمات بحث. وبعدها تختبر وتحسّن وتوسّع. اكتبها مرة واحدة صح، وهتوفر عليك شهور تجارب وفلوس كتير. ولو عايز تتعلمها بالتفصيل، هي أول محور في كورس مصنع الميديا بايرز المجاني على كورس ميديا باير.
ولو عايز فريق مرشد وركس يطبّق المنهجية دي على البيزنس بتاعك ويبني لك نظام تسويق كامل، من دراسة السوق للإعلانات لقياس النتايج، شوف نظام التسويق المتكامل، أو احجز استشارة نراجع فيها أرقامك سوا.
