شركات كتير جداً بتشتكى من قلة المبيعات، انت نفسك ممكن تكون بتعانى من نفس المشكلة! أي عميل بيكلمنا بنساله 3 أسئلة ... بتبيع أزاي؟ وتكلفة العميل الواحد كام؟ ومحتاج كام عميل في الشهر؟

100 عميل؟ 500 عميل؟ 1000 عميل؟

الإجابة على الـ 3 أسئلة دول بيفهمونا كل حاجه تقريباً محتاجين نعرفها عن إذا كان العميل اللي بنكلمة بيعمل تسويق صح ولا مجرد اعلان وخلاص، وبنقدر نحدد المناطق اللي فيها مشاكل وايه اللي ممكن يتعمل عشان نخلى العميل ده يبيع اكتر.

في كل الأنشطة اللي بنعملها سواء مجانية او مدفوعة بيجيلنا شركات كتير اوى، والمشترك بينهم هي نفس المشكلة "انهم بيدفعوا كتير في التسويق لكن البيع مش احسن حاجه"

حتى ان بعض الشركات بتكون مرة بتجارب سيئة جداً مع شركات التسويق الموجودة في السوق سواء في مصر او أي دولة تانية.

بعضهم بيبيع بس مش بيقدر يوصل للهدف اللي محدده، والبعض مش بيعرف يبيع من الاساس!

المشترك بينهم، ان كل التفاعل اللي بيحصل هو لناس بتسأل عن السعر والتفاصيل لكن نسبة قليلة جداً هم اللي بيشتروا.

عشان نوضح ايه السبب في المشكلة لازم نبص على الطريقة اللي الشركات دي بتعمل بيها إعلانات.

في طريقتين الشركات بتتبعها في الإعلانات على الفيسبوك مثلاً، ياما حملة تفاعل او رسائل او حملة كونفرجن، وبيركزوا على بيع المنتج من الإعلان نفسه! معرفش إذا كنت بتعمل نفس الحاجه ولا لا، بس غالباً اه.

المشكلة الحقيقية هنا مش في نوع الإعلان اللي بتعمله او الاستهداف زي مكل الناس ممكن تقولك.

المشكلة انك بتحاول تبيع المنتج من الإعلان نفسه!

لو مش بتعمل كده فمعظم الشركات بتعمل ده، ادخل على الفيسبوك دلوقتى، هتلاقى ان معظم الشركات بتحاول تبيع المنتج من الإعلان نفسه، بدون الاخذ في الاعتبار ان الشخص اللي هيشوف الإعلان ده ميعرفكش، ومفيش أي ثقة بينك وبينه ... الخ.

عشان تحل المشكلة دي لازم تبنى استراتيجية متكاملة تأخذ العميل اللي ميعرفكش من مرحلة لمرحلة لحد ميثق فيك وساعتها العميل ده هيشترى من نفسه.

لما توصل للمرحلة هتكون عارف بالضبط انت بتصرف كام عشان تجيب العميل الواحد وداخلك كام ودى النقطة اللي أي بيزنس بيسعي انه يوصلها.

بالتالي لو سالتك الـ 3 أسئلة تانى الإجابة هتكون مختلفة:

هتكون عارف أزاي توصل للعميل وتبنى ثقة بينك وبينه ودي طريقة البيع.
هتكون عارف التكلفة اللي بتدفعها عشان تبيع لعميل جديد.
هتكون عارف أزاي توصل لإنك تبيع لأي عدد عملاء انت محتاجة.

بعد كده مش هتحتاج تتدخل في عملية التسويق، مجرد بس انك بتبص من بعيد على الأرقام وتحسن فيها عشان توصل لأحسن عائد على كل جنيه بتصرفه في الأنشطة التسويقية.

دي الاستراتيجية اللي هنشرحها كامله في الكتاب ده وأزاي تقدر تطبقها على البيزنس بتاعك خطوة بخطوة واللى هتساعدك تضاعف مبيعاتك خلال 90 يوم بنفس ميزانية التسويق او اقل كمان.