واحد من اهم القرارات اللي هتاخدها في الشركة بتاعتك هو مين العميل اللي عاوز تتعامل معاه؟
اهم عنصر في أي بيزنس هو العميل، بالنسبة لينا على الأقل، العلاقة بين العملاء والارباح علاقة طردية، بالتالي كل ما زاد فهمك للعملاء بتوعك، كل ما زادت ارباحك، وده حاجه مهمه لاى حد عاوز يعمل بيزنس ناجح، لانك هتكون قادر تعرض عليهم المنتج المناسب بالشكل المناسب فى الوقت المناسب.
في تصنيفات كتير اوى موجودة بس أفضل تصنيف لانواع العملاء عدى على ومعرش إذا كان الراجل اللى جبت منه المعلومه دى هو اللى عمله ولا لا، لكن هو اسمه دان لوك، وهي عبارة عن أربع انواع من العملاء ممكن تبيع لهم، اللي عليك إنك تشوف من المناسب ليك وتبيعله وتصنيفهم كالآتى:
1. المشتري اللى بيدور على السعر Cheap buyers
ده العميل اللى اهم حاجه عنده هى السعر، مش شرط الجوده، مش شرط خدمة ما بعد البيع، مفيش اى حاجه مهمه عنده غير السعر، العميل ده غالباً بيشترى حاجات هو مش محتاجها اصلاً لان بس عليها عرض.
2. المشترى اللى صعب ترضيه Difficult buyers
صعب ترضيه مهما حصل، مش بيهتموا انت بتعمل ايه فمهما وفرت لهم معلومات عن المنتج بتاعك هيدوروا على نقطه ناقصه ويحاولوا يسودوا عيشتك، ليه ده مش موجود، يعنى لو منتج متوفر منه لون ابيض واسود، هيقولك عاوزه بنى وليه مفيش بنى ولو قولتله بنى هيدور على حاجه تانيه ناقصه ويقولك عاوز وحتى لو وفرلتله كل اللي هو محتاجة في الاخر مش هيشترى برضو وده موجود كتير اوى على الفيسبوك.
3. المشترى اللى هيقدر القيمة اللى بتضيفهاله Sophisticated buyers
المشترى ده ذكي جداً وفاهم هو عاوز ايه بالظبط، قبل ميشترى حاجه بيعمل بحث فى السوق يشوف مين بيقدم أفضل منتج، مين عنده أفضل جوده، مين عنده أفضل خدمة بعد البيع، وبرضو بيشوف السعر، بس مش بيدور على السعر الرخيص.
4. المشتري اللى بيشترى بناءً على الوظيفة Affluent buyers
النوع ده من العملاء بيشتروا المنتج بتاعك عشان المنتج بتاعك عاجبهم، او بيقدملهم حاجه زى السهوله او الراحه، او بيوفر عليهم مجهود وحاجات تانيه كتير اوى، باختصار بشتروا الوظيفة اللى المنتج بيقدمهالهم.
المختصر المفيد:
العميل الـ Cheap كل صحابه من نفس النوع، العميل الـ Sophisticated كل صحابه من نفس النوع، والسبب في ده ان الناس نفسياً بتميل للتعامل مع الناس اللى شبهها، ليه بقول الكلام ده؟ لأنك لو قررت تختار مثلاً العميل اللى بيدور على السعر الرخيص او العروض فانت بنسبة كبيرة بتحكم على نفسك إنك تفضل تتعامل مع الفئة دي من الناس، انت اكيد عارف الـ Word of mouth، واللى بيعمله الناس اللى اشترت منك.
دلوقتى بقى لو كل الناس اللى اشتروا منك هم ناس بيدوروا على سعر رخيص تفتكر صحابهم هيكونوا غيرهم؟ احنا بنقولك لا، العميل الرخيص بيجيب عميل رخيص.
اختار صح بقي.
