دلوقتى العميل داس على الإعلان بتاعك ودخل على صفحة بيع المنتج، اهم نقطه في الصفحة بتاعتك هي اول حاجه العميل هيشوفها اول ميدخل على صفحة بيع المنتج، عشان كده لازم تكون القيمة دى واضحة وموجهه للعميل ده، طيب ايه هي القيمة اللى بتقدمها؟ باختصار هي السبب الرئيسى اللى هيخلى العميل ده يشترى منتجك.
مثال على ده احنا عندنا كورس اسمه ضاعف مبيعاتك خلال 90 يوم، السبب اللى يخلى اى عميل مستهدف لينا يشترى المنتج ده هو انه عاوز يضاعف مبيعاته والمشكله انه بيعانى من قلة المبيعات.
دى اول حاجه العميل بيشوفها اول ميدخل على الصفحة.
دلوقتى لو انت عميل وبتعانى من ضعف المبيعات فانت من الفئة اللى احنا بنستهدفها، هتكون مهتم تعرف اكتر ولا لا عن المنتج اللى بنقدمه؟ في الغالب اه.
لازم تكتب قيمة واضحة في عشر كلمات توضح فيها ليه العميل لازم يشترى منك وميشتريش من المنافسين، دلوقتى بقى لو عندك صفحة بيع منتج ادخل عليها وشوف القيمة دى موجوده ولا لا؟ لو لا اكتبها.
لازم تعرف ان كل منتج اتعمل عشان يحل مشكله للعميل، دورك كصاحب بيزنس انك تعرف ايه هي المشكله وصيغها في جمله واضحة للعميل بتاعك.
أزاي تعرف ان عرض القيمة بتاعك كويس؟
- تكون واضحة وموجه للعميل
- بتركز على مشكله العميل وحلها
- مختلفة عن المنافسين
لو كتبت اكتر من صيغة لعرض القيمة بتاعتك، ومحتار بين الأفضل، يبقى لازم تعمل A/B Test عشان تعرف انهى قيمة احسن من التانيه واللى بيحكم هنا هو الكونفرجن من كل قيمه فيهم.
في الخطوة الجاية هتعرف ازاى تعمل A/B Test
