خطوات إنشاء موقع إلكتروني
الخطوة الأولى: تحديد أهداف الموقع الإلكتروني
قبل البدء فى حجز اسم النطاق أو اتخاذ خطوة تجاه تصميم الموقع الإلكتروني يجب على كل من يرغب فى تصميم موقع إلكتروني ان يحدد من 1 الى 3 اهداف للموقع، وتختلف الأهداف من موقع إلى آخر، فإذا كانت الشركة صغيرة فيكون الهدف من الموقع هو زيادة الوعي عند الجمهور المستهدف للشركة، واذا كانت الشركة كبيرة فستحتاج الشركة الى برمجة منصة متكاملة لتمكين عملائها الحاليين من الاستفادة القصوى من خدماتها … الخ.
معلومه هامه جداً: لا تقوم بتحديد أكثر من 3 أهداف للموقع، على الأقل فى البداية.
الخطوة الثانية: حجز اسم النطاق (اسم الشركة) والاستضافة (الهوستينج)
اسم النطاق هو اسم الشركة على الويب وهو الاسم الذي يستخدمه العميل للوصول الى موقعك، ويكون بهذا الشكل (www.yourcompanyname.com) ويوجد نهايات مختلفة مثل (net) (org) (co)، ويتم استخدام اسم النطاق فى حسابات البريد الإلكتروني مثل (youremail@yourcompanyname.com).
الاستضافة هى الخادم أو الحاسب الذى نقوم برفع ملفات التصميم علية ونحتاجه ايضاً من أجل حسابات البريد الإلكتروني للشركة، وتوجد اختيارات متعددة باقات الاستضافة لملفات الموقع الإلكتروني.
معلومة هامة جداً: لن تحتاج الى استضافة ضخمة لاستضافة موقعك فى البداية.
يوجد الكثير من الشركات تقدم خدمة تسجل الدومين والاستضافة واشهرهم Godaddy – Bluehost – Whois – Hostgator
سعر اسم النطاق لا يتختلف كثير والخدمة تعتبر واحدة ولا يوجد اختلاف فى الجودة بين مقدمين الخدمة المختلفين، لكن يجب ان يكون اختيارك بناءاً على جودة الاستضافة، الافضل ان تقوم بحجز اسم النطاق والاستضافة مع شركة واحدة لانه يسهل عليك ربط الاسم بالاستضافة، والتى تسمى DNS، لن تحتاج الى التعمق فى معرفتها لانها تحدث بشكل اوتوماتيكي عند التسجيل.
الامر الاصعب حالياً هو الاستضافة! ما هى الاستضافة الانسب لموقعك؟ هناك اختلافات كثيرة جداً بين مقدمين الخدمة وباقات الاستضافة نفسها، ويصعب عليك التفريق بينهم ومعرفة اى الباقات التى يجب عليك اختيارها، يفضل استشارة احد المتخصصين اذا قررت القيام بهذه الخطوة بنفسك، للاختصار جميع الباقات فى كل فئة متشابهة والشئ الوحيد الذى يجب عليك التأكد منه واختيار مقدم الخدمة عليه هو خدمة ما بعد البيع، أى خدمة العملاء.
بعض النصائح فيما يخص اختيار اسم النطاق والاستضافة
- اشتغل مع جودادى – Godaddy هم مش ارخص حاجه فى السوق بس الافضل فى خدمة ما بعد البيع وده بتحتاجه جداً
- متسترخصش، استثمارك فى الاستضافة شى اساسى وهيريحك جداً فى المستقبل
- حاول تحجز اسم نطاق دوت كوم، كل الناس متعوده تكتب دوت كوم من غير متفكر
- خلى اسم الدومين سهل ومختصر وبيعبر عن الشركة ونشاطها
- بلاش تحط ارقام فى الدومين
الخطوة الثالثة: تجهيز محتوى الموقع الإلكترونى
المحتوى هو جميع البيانات التى تقوم بوضعها على الموقع الإلكتروني الخاص بك وتشمل على العديد من الانواع، مثل صور المنتجات، النصوص التعريفية بالشركة ونشاطها، بيانات التواصل بالشركة مثل الهاتف والبريد الإلكتروني والعنوان … الخ، ويمكن ايضاً اضافة فيديوهات للموقع الإلكتروني.
الخطوة الرابعة: تصميم الموقع
هل ستقوم بتصميم الموقع بنفسك؟
لو عندك شوية خبرة ووقت او مش معاك ميزانية كفاية وبتدور على حل تقدر بيه تصمم موقع الكتروني بنفسك، فى مواقع كتير بتقدملك الخدمة دى مجاناً اشهرهم موقع اسمه Wix وموقع اسمه WordPress
تعالوا نشوف ازاى تعمل تصميم موقع مجاناً على Wix
موقع Wix بيقدملك خدمة تصميم موقع مجاناً من الألف بكل سهوله، كل اللى عليك انك تسجل حساب عليه وبعدين تختار التمبلت اللى يعجبك من نماذج مواقع جاهز كتيير مبنية بجوده عالية واحدث التكنولوجيا اللى موجوده فى السوق وحتى التعديل وتصميم المواقع سهل جداً.
ده شرح كامل ازاى تقدر تصمم موقع على Wix
تعالوا نشوف ازاى تعمل تصميم موقع مجاناً على WordPress
موقع WordPress يعتبر واحد من اكبر المؤسسات اللى بتقدم خدمة تصميم موقع مجاناً، وده جنب حلول تصميم مواقع غير مجانيه، بس تكلفتها مش عالية خالص، وبتدفع شهرياً.
هل ستكلف شركة تصميم مواقع بتصميم موقعك؟
لو قررت انك تشتغل مع شركة تصميم مواقع، فخلينى اقولك ازاى تختار افضل شركة تصميم مواقع وازاى تتفق معاهم على تصميم الموقع اللى فعلاً يحققلك الفايدة اللى انت مستنيها مش مجرد موقع وخلاص
بص الاول وقبل كل حاجه انت عارف السوق المصرى مضروب فى حاجات كتير، وده بيخلي فى تضارب رهيب فى الاسعار، يعنى لو اختارت مثلاً لو دخلت على جوجل ودورت على شركات تصميم مواقع ودخلت على اول ١٠ شركات تصميم مواقع، وبعتلهم طلب عرض سعر للموقع بتاعك هتلاقى فى شركة تصميم هتقولك تصميم الموقع ده هيكلفك ٥٠٠ جنية وشركة تانيه هتقولك تصميم الموقع هيكلفك ٣٥ الف جنية!
مشكلة الموضوع ده فى انه منتج مش ملموس، تعالا نبصلها على انها منتج ملموس مثلاً ليه ممكن يكون فى فرق بين الاسعار بالشكل ده مانا بشترى نفس الحاجه؟! انا نفسى لما كان حد بيسالنى ليه الموقع غالى كده انا فى واحد قالى ٥٠٠ جنية، كنت بقوله عارف الفرق بين العربية الهوندا والمرسيدس
تعالا نوضح الفرق بين الاسعار ده جاى منين وعشان نعمل ده محتاجين نوضح انواع تصميم المواقع والفروقات بينهم:
تصميم موقع الكتروني ستاتيك
الموقع الاستاتيك ده يعتبر ارخص حاجه موجوده فى السوق وده عبارة عن تصميم موقع باستخدام HTML – CSS وده موقع الكتروني بسيط جداً مكون من صفحة او اكتر وبيقدم معلومات عن الشركة بتاعتك ومش بيكون داخل فيه برمجه ولا قواعد بيانات وعشان تعمل اى تعديل عليه لازم يكون عندك معرفه بالـ HTML – CSS
سعره بيتراوح ما بين ٥٠٠ لـ ١٠٠٠ جنية
تصميم موقع الكتروني دينامك
الموقع الدينامك عبارة عن موقع داخل فيه برمجه وقواعد بيانات وبيكون معاه لوحة تحكم بتخليك تقدر تضيف اى محتوى جديد او تعدل على المحتوى الموجود بالفعل، وده النوع المطلوب والاكثر استخداماً بين شركات تصميم المواقع
سعره بيبدء من ٢٠٠٠ جنية
التكلفة بتختلف بناءاً على حجم المحتوى والوظائف اللى بيؤديها الموقع وطبعاً الوظائف دى بتختلف من موقع للتانى على حسب نوع النشاط اللى بيخدمه الموقع والوظائف دى زى البحث وادارة المحتوى والمتجر … الخ
فى ناس كتير كانت بتكلمنى عاوزين متجر الكتروني زى سوق وجوميا او موقع بيقدم حجز فنادق … الخ، بالنسبة للجزئية دى فى نقطة احب اوضحها قبل منكمل وهى انك لو بتفكر تنافس سوق او جوميا او عقار ماب او تريفاجو او اى موقع تانى لازم تكون فاهم ان المواقع دى بيضخ فيها ميزانية ضخمة جداً وبحصل تطوير عليها دايماً فلما تروح لشركة تطلب منها تصمملك موقع زى سوق لازم تكون فاهم الميزانيه هتكون كبيرة بشكلاً ما، فى حل طبعاً بديل لو عاوز تبدء حاجه زى دى وهى انك تطلب من شركة التصميم انهم ينفذوا الشغل بثيم جاهز، ده هيوفرلك وقت وفلوس كتير اوى وبرضو الشغل هيطلع تمام وجودته عاليه.
طب ايه الفرق بين استخدام ثيم جاهز او كتابة الكود من الصفر؟
بالنسبة للحماية: المواقع الإلكترونية اللى بيتم تصميمها من الصفر بتكون اكثر حماية لان الكود بتاعها بيكون فريد من نوعه ومش معروف للعامة وده بيخلى نسبة الامان فيه عالية على عكس المواقع الجاهزه زى وردبرس مثلاً، ده طبعاً مش معناه ان مواقع الوردبرس الحماية فيها ضعيفة، لا دى عالية جداً برضو بس لازم يتعمل حسابها وبيدفع فيها فلوس برضو عشان تأمن موقعك.
بالنسبة للتكنولوجيا: تقريباً نفس التكنولوجيا هى هى فى تنفيذ الموقع من الصفر او باستخدام ثيم جاهز، يعنى لغات البرمجة هى هى وقواعد البيانات برضو هى هى
بالنسبة للاسعار: بالنسبه للموقع لو هيتنفذ من الصفر هتبدأ تكلفته من 30 الف وانت طالع بقى ولو هتعمل نفس الموقع باستخدام ثيم جاهز هيتراواح ما بين 10 الى 15 الف
القرار ليك فى الاخر بس نصيحة لو فى عندك فكرة موقع الكتروني بالشكل ده ابدء بالثيم الجاهز هيوفر معاك وقت كتير وفلوس اكتر وهيوفى بالغرض اللى انت عاوزه منه، انما لو الموضوع بقى مشروع وهيكبر وهتستثمر فيه فلوس كتير وناوى تكبره فى المستقبل فالاحسن انك تجيب فريق عمل فى الشركة عندك يعملك الشغل لان ده هيساعدك على التطوير دايماً لان الاكواد البرمجية هتكون تحت ايدك.
الخطوة الخامسة: إجراء الاختبارات
فى هذه المرحلة يجب إجراء اختبارات لجميع وظائف الموقع للتأكد من سلامتها قبل اطلاق الموقع للجمهور، ويتم اختبار الموقع بالكامل ثم اجراء التعديلات بناءاً على نتيجة الاختبارات.
معلومة هامة جداً: لا تغفل هذه المرحلة مهما كلف الأمر.
الخطوة السادسة: إطلاق الموقع للجمهور
ويتم ذلك عن طريق تحميل ملفات الموقع الى الاستضافة ويتم القيام بهذه الخطوة باستخدام واحدة من التكنولوجيا المتاحة مثل الـ File manager او من خلال FTP.
بهذا نكون انتهينا من مراحل إنشاء موقع إلكتروني بالكامل ويكون موقعك الإلكتروني متاح للجمهور.
