الدرس الرابع من كورس ريادة الاعمال
البيزنس بتاعك هيجيب فلوس ازاى ومنين؟ ده السؤال الرئيسى الى هنجاوب عليه فى المقالة دى، طيب هنجيب الفلوس دى ازاى؟ ومين الى هيدفع؟ وهنوصله ازاى؟ ومحتاجين نعمل ايه عشان نوصله؟ كفاية كده تعالوا نبدء.
الاداه الى هنستخدمها النهارده اسمها Business Model Canvas، قبل منتعرف على الاداه دى محتاجين الأول تعرف ايه الفرق بين الشركة الناشئة والشركة القائمة؟
الشركة الناشئة هى الشركة الى فى بدايتها وبتدور على النموذج الناجح الى يشغلها وضمن ده اصحاب الشركة الناشئة بيمروا بمرحله تطوير لاكتشاف مين هو العميل وايه هو السعر المناسب ليه وحاجات تانيه هتتعرف عليها وانت شغال على الـ Business Model Canvas، اما الشركة القائمة فهى شركة عرفت ايه هو النموذج الى يشغلها وبتنفذ النموذج ده كل يوم.
ايه هى الـ Business Model Canvas؟
أداه بتتكون من ٩ عناصر، بيستخدمها رواد الاعمال عشان يقدروا يحددوا النموذج الناجح للبيزنس بتاعهم، وبيوضح ازاى شركة بتقدم منتج معين لمجموعة من العملاء، وده بيتم عن طريق الاجابه على اربع اسئلة اساسية وهم ايه الى بنقدمه ومين العميل وازاى هتقدمله المنتج وليه هتقدمهوله؟
سجل ايميلك وهنبعتلك نسخه من الـ Business Model Canvas على الايميل بتاعك.
العنصر الأول: القيمة المقترحة Value Proposition
فى الجزء ده هتجاوب على سؤال ايه الى بتقدمه؟ وهنا مش بتوضح المنتج او الخدمة، انت بتوضح ازاى انت بتحل مشكله لمجموعة من الناس او بتغطيلهم حاجه لمنتج او خدمة ما، والى منها بتوضح ازاى تقدم منتج او خدمة ترضى العملاء دول.
الأسئلة
- ايه القيمة الى بتقدمها؟
- ايه المشكله الى بتحلها؟
- ايه مواصفات المنتج او الخدمة الى هنقدمها لكل شريحة عملاء؟
- ايه الحاجه الى بنشبعها للعميل؟
العنصر التانى: شرائح العملاء Customer Segments
فى الجزء ده هتجاوب على سؤال بتقدم المنتج او الخدمه لمين؟ وايه اللى هيخليهم يشتروا منك؟ ممكن يكون عندك اكتر من شريحة للعملاء، مثلاً جوجل عندها شريحتين الاولى الناس الى بتعمل بحث والتانى المعلنين، كل شريحة بتحتاج تعرف عنهم كل حاجه، ساكنين فين وعايشين ازاى وعندهم كام سنه … الخ
الأسئلة
- مين العميل الى بنقدمله المنتج او الخدمة؟
- ايه هى مواصفات العميل زى، ساكن فين، سنه قد ايه، بيدرس ولا لا؟
- مين هو اهم عميل ضمن شرائح العملاء؟
العنصر التالت: القنوات Channels
فى الجزء ده هتوضح القنوات الى هتوصل عن طريقها المنتج بتاعك للعملاء المحتملين، مثلاً لو شغال فى مجال الاثاث، ايه هى القنوات الى ممكن توصل المنتج للعميل بيها؟ اكيد المعارض، القنوات بتنقسم نوعين على حسب نوع المنتج نفسه، اذا كان منتج مادى زى الاثاث والملابس .. الخ او وهمى زى الموبيل ابلكيشن او الخدمات الى بتتقدم عن طريق المواقع الالكترونية، عشان تفهم اكتر الجزء ده، اسال نفسك ايه المكان الى هتعرض فيه المنتج عشان العميل يشوفه ويشتريه؟
الأسئلة
- ايه هى قنوات التوزيع الى نقدر من خلالها نوصل المنتج للعميل؟
- ايه هى افضل قناه؟
- ايه اقل قناه تكلفة؟
العنصر الرابع: علاقات العملاء Customer Relationships
فى الجزء ده بتوضح ازاى هتجيب العملاء بتوعك وازاى تقدر تقنعهم بانهم يشتروا المنتج بتاعك، برضو ازاى هتحافظ عليهم وتنميهم وبرضو بتختلف الـ Customer Relationships باختلاف نوع المنتج اذا كان مادى او وهمى.
الأسئلة
- ازاى هنجيب العملاء؟
- ازاى هنحافظ على العملاء؟
- ازاى هتزود عددهم
العنصر الخامس: الارباح Revenue Streams
فى الجزء ده بتوضح الاستراتيجية اللى العملاء المحتملين هيدفعولك بيها مقابل المنتج او الخدمة بتاعتك؟ الاستراتيجية دى ممكن تكون عن طريق البيع المباشر او عن طريق الاشتراكات او البيع اونلاين، فى بعض الاحوال المنتج بيكون مجانى، وبناءاً على الاستراتجية بتاعتك بتعرف طريقة تسعير وسعر المنتج بتاعك.
الأسئلة
- ايه هى القيمة الى العميل هيدفع عشان يشتريها؟
- هيدفعوا ازاى؟
- ايه الطرق الى يحبوا يدفعوا بيها؟
- ايه هو اجمالى الارباح؟
العنصر السادس: الموارد الرئيسية Key Resources
هنا بتوضح ايه الموارد الى انت محتاجها عشان توصل المنتج بتاعك لشرائح العملاء بتوعك، والجزء ده بيجاوب على سؤال ازاى هتوصل القيمة دى للعملاء؟ الموارد دى ممكن تكون رأس مال للمشروع، اوموارد مادية زى مصنع او مكتب بكل مشتملاته، او اشخاص ودول موظفين وممكن يكونوا فريق عمل، حقوق ملكية … الخ
الأسئلة
- ايه هى الموارد الى محتاجها عشان توصل المنتج؟
- ايه هى الموارد الى محتاجينها عشان قنوات التوزيع؟
- ايه هى الموارد الى محتاجينها فى جزء علاقات العملاء؟
العنصر السابع: الشراكات الرئيسية Key Partnerships
الشراكات عبارة عن الاتفاقات الى بتعملها مع الموردين او الشركاء عشان توفر اجزاء انت مش عارف توفرها ولا عندك الموارد الى تقدر تنفذها بيها، زى مثلاً لو فكرت تعمل مطعم، فانت محتاج تعمل شراكه مع مورد للعيش مثلاً ومورد للمواد الخام الى هتصنع بيها الاكل، ممكن تكون محتاج شريك يوفرلك راس مال، يبقى الشراكه هى اى اتفاق لتوفير موارد متقدرش توفرها بنفسك.
الأسئلة
- مين هم الشركاء الرئيسين؟
- مين هم الموردين؟
- ايه هى الموارد الرئيسية الى محتاجين شركاء يوفروها؟
- ايه هى الانشطة الرئيسية الى محتاجين شركاء يوفروها؟
العنصر التامن: الانشطة الرئيسية Key Activities
فى الجزء ده بتوضح ايه الانشطه الى محتاج تعملها عشان تنفذ البيزنس موديل بتاعك، بتختلف طبعاً انواع الانشطه باختلاف نوع المشروع، يعنى مثلاً لو بتصنع حاجه فالانشطه هتبقى متعلقة بعملية التشغيل او بتحل مشكله وساعتها الانشطه هتكون متعلقة بحل المشكله، وده عن طريق تطوير المنتج او الخدمة.
الأسئلة
- ايه هى الانشطة الى المطلوبه عشان نوصل القيمة للعميل؟
- الانشطة الى محتاجينها عشان قنوات التوزيع؟
- ايه هى الانشطة الى محتاجينها فى الجزء الخاص بعلاقات العملاء؟
- ايه هى الانشطة الى محتاجينها فى الجزء الخاص بالارباح؟
العنصر التاسع: التكلفة Cost structures
فى الجزء ده بتكتب كل التكاليف والمصاريف الى هتحتاجها عشان تنفذ البيزنس موديل بتاعك، وهنا بتحسب كل التكلفة المباشرة والغير مباشرة، تكاليف التشغيل وتكاليف الانشاء وتكاليف التأسيس … الخ
الأسئلة
- ايه هى التكلفة المباشرة والغير مباشرة؟
- ايه هى التكلفة الخاصة بتوفير الموارد الرئيسية؟
- ايه هى التكلفة الخاصة بتنفيذ الانشطة الرئيسية؟
ازاى تستخدم الـ Business Model Canvas؟
- الخطوه الاولى: اطبع نسخة من البيزنس موديل فى المطبعة مقاسها
- الخطوه التانية: هات Sticky Notes
- الخطوه التالتة: ابدأ جاوب على الاسئلة الموجوده فى كل خانة من البزنس موديل
- الخطوه الرابعة: اسأل مجموعة من العملاء المحتملين عن كل اجاباتك
- الخطوه الخامسة: عدل البيزنس موديل فى ضوء الى هتسمعه منهم