عملت تحدى العشر سنين ولا لسه؟ لو فتحت الفيسبوك او الانتسجرام مؤخراً هتلاقى صور كتير لصحابك عبارة عن صورتين واحده قديمة من سنة 2009 وواحد جنبها من سنة 2019، عمتاً مش معروف ابتدى امتى ومين اللى عمله، بس انتشر بشكل كبير وشارك فيه ناس كتير اوى منهم مشاهير.
زيه زى حاجات كتير بقت ترند فى وقت قليل اكتر، الموضوع ممكن يبان للناس انه صدفه، بس الحقيقة غير كده خالص، فى علم ورا الموضوع ده وفى طريقة ومنهجية بتخلى الناس تتكلم على فكرة او منتج معين، وده بدورة بيخليه يبقى ترند على السوشيال ميديا.
لو ليك فى التسويق اكيد سمعت عن الـ Word of Mouth، شركات كتير بتحاول تعرف الناس بمنتجها عن طريق الدعاية والاعلان، اكيد عارف ان الاعلانات تكلفتها عالية بالنسبه للمردود بتاعها، فكر فيها كانك عميل لمنتج معين، هل تحب تسمع عن منتج او تشوفه فى اعلان بيقول ان المنتج الفلانى احسن منتج ف الدنيا، ولا الاحسن انك تسمع عنه من صديق ليك بعد ميجربه؟ بالنسبه ليا لما بشوف اعلان بحس انه مش حقيقى لانه دايماً بيحاول يميز المنتج بافضل المميزات اللى فى الدنيا وان ده افضل منتج فى الكون، زى اعلانات اريال وبرسيل ومعاهم تايد مثلاً كلهم بيتنافسوا على البياض وانك لو غسلت بمنتجهم، الهدوم هتكون اكتر بياضاً وكمان بتقضى على البقع، على النقيض تماماً لما واحده صاحبتى تيجى تقولى انها غسلت بالمسحوق الفلانى اللى طلع البقى ومسابش اثر، نسبة انى اجرب المنتج هتكون كبيرة.
الناس لما بتتكلم عن المنتج بالايجاب او السلب، المنتج بينتشر بشكل كبير وده بيزود مبيعاته بشكل كبير، لانك هتتعرف اكتر بين الناس ولان ده مؤثر اكتر من اى حاجه تانى حاول تحافظ على صورة منتجك عند الناس لانك ياما هتكون ترند حلو او ترند وحش ومعروف طبعاً تأثير كل واحد عليك!
كان فى حاجه كنت درستها فى المبيعات وهى ان كل انسان بيأثر فى حوالى 200 شخص، عن طريق الـ Word Of Mouth، طبعاً لو هيتكلم عنك بصوره حلوه ده هيأثر على مبيعاتك بالايجاب لو هيتكلم بصوره وحشه ده هيأثر على مبيعاتك بالسلب.
فى نقطة مهمه اوى محتاج اوضحها قبل مندخل على الاستراتيجية اللى بتخلى اى حاجه تبقى ترند، لو سالتك ايه هى نسبة الـ Word of Mouth اونلاين بالنسبه للـ Word of Mouth اوفلاين، الاجابات هتختلف، بس مش هطول عليك، النسبه هى 7% اونلاين والباقى اوفلاين
ليه حاجه معينة بتبقى ترند؟
فى كتاب اسمه Contagious: Why Things Catch On، للكاتب Jonah Berger، فى الكتاب ده هتلاقى الكاتب بيتكم عن انهم عملوا دراسات على منتجات وافكار كتير بقت ترند على مدار السنين اللى فاتت واكتشفوا ان كل الحاجات اللى بقت ترند لمجموعة اسباب معينة وان الحاجه كانت بتنتشر بين الناس وتخليهم يتكلموا عنها لنفس الاسباب، واللى بقت بعد كده الاستراتيجية اللى تقدر بيها تخلى اى حاجه تكون ترند، الاستراتيجية اسمها STEPPS وده اللى هنتعرف عليه فى الفقرة الجايه
استراتيجية STEPPS
الـ Social Currency
الناس بتتكلم عن الحاجات اللى بتخليهم يظهروا بشكل افضل، لو لاحظت معظم الناس لما بتتكلم عن حاجه بنسبة ٩٠٪ بتكون حاجه ايجابيه، يعنى يكلمك عن انجازاته واخر سفرية ليه واخر مكان كان سهران فيه واحلى يوم قضاه فى حياته … الخ، ليه بيتكلموا عن الحاجات دى؟ عشان بتدى انطباع للى بيسمعهم بانهم افضل، قيس على ده بردو معظم الصور اللى الناس بتشيرها لنفسها على السوشيال ميديا، صوره للفطار، صوره ليه فى الفرح وهو لابس بدله او لابسه فسان سهره، صوره فى المطلعم الفلانى اللى غالى طبعاً واللى بيروحوا صفوه ومعاهم فلوس، محدش بيصور نفسه وهو واقف بياكل لحمه راس على عربية فول، لان ده هيخلى شكلهم وحش.
الـ Triggers
الـ Triggers هى اى حاجه موجوده فى الحياه بتاعتنا ممكن تفكر الناس بمنتجك او المحتوى اللى بتعمله، معروف ان الناس بتتكلم عن اكتر حاجه شاغله تفكيرها، مثلاً هتلاقى الناس بتعمل شير للمحتوى اللى بيفكرهم، شركة KitKat فى حملة دعاية عملوها ربطوا المنتج بتاعهم بالبريك، ودى تعتبر حاجه بتتكرر يومياً عند الناس كلها
الـ Emotion
برضو الناس بيتكلموا عن الحاجات اللى بتحرك مشاعرهم، ودى تعتبر اكتر حاجه بتخلى الناس تتكلم يعنى لما الناس بتحس احاسيس معينة بيزيد عندهم الرغبة فى الكلام عن الشئ ده
الـ Public
فى حقيقة فى سلوك الناس وهى اننا بنقلد، الموضوع مطلعش تقليد اعمى زى ماحنا فاهمين، الموضوع ليه علاقة بحاجه اسمها Social Proof ومعناها ان الناس بتاخذ قرار بناءاً على قرارات ناس تانى اخدوها لاننا عندنا ثقه فىهم، مثال على ده لو انت فى مكان غريب وعاوز تاكل ونزلت تدور على مطعم اكل بيتزا مثلاً ولاقيت اتنين فاتحين محلات بيتزا فهتبص على اللى عنده ناس اكتر، لان ده هيكون معناه عندك ان الاكل هنا احلى والا الناس مكانوش راحوله وسابوا التانى، هنا بقى لازم تبين للناس الميزه دى ومتسيبهاش مستخبية، يعنى ميكونش ازاز المحل غامق مثلاً، محدش هيشوف ده.
لو هتركز شوية ازاى الشركات بتستغل الجزئية دى هتلاقى انهم بيحطوا صورة اللوجو بتاعهم على المنتجات، زى Apple و Nike مثلاً
الـ Practical Value
لو شغال فى الماركتينج فاكيد سمعت عن الـ Inbound marketing وهى طريقة لجذب العملاء عن طريق تقديم محتوى تعليمى، ده بالظبط الـ Practical Value وهى انك بتقدم محتوى مفيد للناس من غير متقولهم اشتروا المنتج بتاعى واللى بدوره بيخلى الناس يشيروه لان بطبيعة البشر رغبة اننا نساعد الناس فى انهم يتعلموا حاجه جديدة او حاجه احنا شايفينها مفيده بتكون عالية جداً.
الـ Stories
مش محتاج اقولك ان الـ Story Telling Techniques واحده من اهم المهارات لاى حد شغال فى الماركتينج، تخيل كده عاوز تقول لوحد ان فى مكان ما بيبع حاجه وعندهم طريقة طبخ معينة، مثلاً مطعم يابانى بيطبخ الاكل وانت قاعد على الترابيزه، اكيد هتحكيله قصه عشان تدخله فى المود ومعاها هتقوله الرسالة اللى انت عاوزه توصلهاله من الاول، اللى لو كنت استعجلت وقولتها مكانتش هتأثر عليه نفس التأثير اللى حصل لما دخلتها فى قصه.
شركات كتير بتستهدف المشاهير على السوشيال ميديا عشان يتكلموا عن منتجاتهم وغالباً المشاهير دول عشان ميحسسكش انه بيعمل اعلان للشركات دى بيدخلهالك فى قصه، انه راح المطعم الفلانى وحصل معاه كذا وكذا وكذا.
ده دليل هيساعدك تخلى الفكرة او المنتج بتاعك يكون ترند على السوشيل ميديا … حمل الملف من هنا
المصادر
