في قاعدة في البيزنس بتقول “If you can’t measure it you can’t manage it”
عشان كده مهم اوى إنك تبقى عارف الارقام بتاعتك، وده سبب اساسى للنجاح فى حملات الدعاية اللى هتعملها على الفيسبوك او غيره.
لازم تبقى عارف انت بتدفع كام وبتكسب كام، او بتخسر كام على حسب بقي، الارقام هي اللي هتوضحلك انت ماشي صح وهى اللي هتوضحلك ايه اللي محتاج يتغير.
اكيد سمعت عن الـ KPIs وهي اختصار الـ Key performance Indicators، وهي مؤشرات الأداء الرئيسية اللى بناءً عليها بتحدد البيزنس بتاعك ماشى ازاى.
فى مؤشرات كتير، هنتكلم هنا عن اهم 3 مؤشرات هنحتاجها فى الاعلانات بتاعت الفيسبوك:
تكلفة العميل المحتمل Cost per lead
ودى بتحسبها عن طريق قسمة تكفلة الاعلان فى فترة زمنية على عدد العملاء المحتملين اللى سجلوا بياناتهم فى نفس الفترة الزمنية لحملة تسويق معينة.
تكلفة العميل الواحد Cost per acquisition
ودى باختصار التكلفة اللى بتدفعها مقابل اقناع عميل محتمل بشراء منتجك او خدمتك، وبتحسبها عن طريق قسمة التكاليف لحملة دعاية فى فترة زمنية معينة على عدد العملاء اللى اشتروا منك فى الفترة دى.
ودى تعتبر اهم مؤشر للبيزنس بتاعك، لان بيها بتقدر تحدد اذا كان التسويق بتاعك مظبوط ومربح ولا لا.
قيمة العميل الواحد Lifetime value
وتقدر تحسبها عن طريق جمع كل الارباح اللى بتحصلها من العميل الواحد خلال الفترة اللى العمليل بيقضيها فى استخدام البيزنس بتاعك وتطرح منها تكلفة العميل الواحد.
المختصر المفيد:
لو مش هتقدر تقيس نتيجة اللى بتعمله يبقى مش هتعرف تديره، عشان كده لازم تعرف العميل الواحد بيكلفك كام لحد ميشترى منتجك وبتكسب منه قد ايه على مدار علاقتك بيه، ده هيخليك تقدر تحدد بالظبط انت محتاج او ممكن تصرف قد ايه على التسويق عشان تبيع منتجك لعميل واحد، بالتالي هتتحكم بشكل كامل فى الاعلانات اللى هتعملها على الفيسبوك.
لما تعرف وتحدد الارقام بتاعتك، هتقدر تكبر البيزنس بتاعك وانت مطمن، وبناءً عليه هتحدد الاستراتيجية اللى هتوصلك لاى هدف هتحدده.
