لو خيرونا بين كل أسباب شراء العميل لمنتج او خدمه هنختار الثقة، مفيش حد هيشترى منتجك الا لو بيثق فيك، وزى مكلنا عارفين ان الثقة تكتسب لا تشترى، عشان كده لازم تحاول بكل الطرق عشان تكسب ثقة العملاء بتوعك.
لو بصيت على المنافسين هتلاقى كلهم بيقولوا نفس الكلام، احنا احسن شركة وعندنا احسن منتج من حيث الجودة وبنبيع بأقل سعر، الحقيقة ان الناس شبعت من الكلام ده وكله بيقى عارف ان ده كلام تسويق والسلام.
الثقة بينك وبين العملاء بتخليهم يشتروا منك وهم مغمضين، انا مثلاً لو عاوز اشترى حاجه اونلاين اول مكان بفكر فيه هو جوميا او سوق لان في ثقة بينى وبينهم، وده يرجع لاسباب كتيره منها انى اشتريت منهم قبل كده وجربت ارجع منتج وكان الموضوع سهل وبسيط وأسباب تانيه كتير.
وبلاقى صعوبة جداً انى اشترى منتج من شركة تانيه لو مش متوفر عليهم لانى مش بثق فيهم، لكن تخيل انى ممكن اشترى من موقع ماعرفوش ولا حتى اراجع سياسة الاسترداد بتاعتهم لان صديق ليا جربهم وقالى ان الموقع ده كويس، هشترى وانا مغمض.
تعمل ايه عشان الناس تثق فيك وتشترى منك؟
- اثبت للعميل ان قادر توفى بالوعد بتاعك
ضيف جزء خاص يثبت ان المنتج بتاعك هيوفر للعميل الحل اللى وعدته بيه، زى أراء العملاء اللى اشتروا المنتج قبل كده، او دراسات لحالات شبيه لعملاء اشتروا المنتج والنتائج اللى وصلولها بعد كده.
- وفر للعميل اكتر من وسيلة للاتصال بيك
لازم تضيف صفحة اتصل بنا وتحط فيها خريطة لمكان الشركة بالإضافة للعنوان وأرقام التليفونات وجميع وسائل التواصل اللى بيها يقدر العميل يتواصل مع الشركة في حال حصلت مشكلة.
- استخدم صور احترافية لعرض المنتج
استثمر شوية في صور المنتج، متحطش اى صور وخلاص، شوف مصور محترف او اشترى كاميرا وصور انت المنتجات، اهم حاجه ان الصور تطلع احترافية، وصور المنتج من كل اتجاه وحاول دائما ان الصور تكون على خلفية بيضاء، زى صور سوق وجوميا كده.
- وفر فيديو بيشرح طريقة استخدام المنتج
لو حطيت فيديو وانت بتشرح ازاى الناس تستخدم المنتج وقد ايه المنتج ده هيساعدهم في حل المشكله اللى عندهم هيفرق جداً، لانك بكده بتبنى توقعات عند العميل للمنتج اللى هيستلمه وبتكون عنده معرفة مسبقة بطريقة استخدام المنتج.
- الضمان وسياسة استرداد الاموال
واحده من المخاوف العظيمة اللى عند العميل واللى بتمنعه انه يشترى هي ان المنتج يطلع مش مطابق للصورة او المواصفات الفنية او مش مظبوط على مقاسه زى في مجال الملابس وبنعالجها اننا بنحط سياسة لاسترداد الأموال في حالة ان المنتج طلع في اى حاجه حتى اننا احياناً بنقول لو المنتج مش عاجبك رجعه وخد فلوسك.
- وضح للعميل ليه يشترى منك؟
وضح للعملاء ليه الشركة بتاعتك احسن شركة بتقدم المنتج او الخدمة دى؟ ايه هو تاريخ الشركة وبقالها قد ايه في السوق؟ مين الفريق المتخصص ورا المنتج او الخدمة؟ اى سابقة اعمال مع شركات كبيره.
- زود المصداقية في موقعك
استثمر شوية في تصميم الموقع، لو الموقع بتاعك شكلة وحش ومش منظم تأكد انك هتخسر ثقة العملاء بسرعة البرق، لان الانطباع الأول يدوم، هيكون من الصعب عليك انك تغير الصورة الذهنية اللى اترسمت عند الناس في اول زيارة لموقعك.
استخدم صور حقيقة ليك ولفريق العمل بدل الصور اللى ممكن تشتريها من على مواقع الصور زى shutterstock لان الناس بتحب تتعامل مع ناس شبهها، يعنى متبقاش في مصر وتحط صور لناس من أمريكا، مفيش واقعيه!
اعمل تحديث دائماً للموقع بتاعك، لو غيرت رقم التليفون لازم تغيره على الموقع وهكذا كل البيانات اللى متوفره على الموقع، برضو لازم تنزل محتوى باستمرار، لان ده بيرتبط عن الناس بصوره ذهنيه ان في فريق عمل دائم وموجود ورا البيزنس ده.
تخيل انك داخل تاكل في مطعم ولاقيته مش نضيف او الفريق اللى بيقدملك الاكل لابسين لبس وحش؟ ايه انطباعك؟ هل هتكمل اكل ولا هتمشى؟ طب لو كملت … هل ممكن تقول لاصحابك يروحوا ياكلوا هناك؟
المختصر المفيد:
حط نفسك مكان العميل لو عاوز تشترى المنتج ده، ايه اللى محتاج تشوفه عشان تشترى؟ ايه اللى ممكن يمنعك من الشراء ويخليك تغير رائيك؟ هل الضمان؟ هل سياسة الاسترجاع؟
وخليك دائما فاكر ان العميل هيدور على اى سبب يخليه ميشتريش منك، ودى طبيعة في سلوك البشر عموماً، حاول متسيبش فرصه لده انه يحصل.