المشكلة اللى هنتكلم عليها النهاردة تعتبر السبب الأول ليه التسويق بتاعك مش تمام!
مش عاوز أطول عليك، المشكلة باختصار هي انك مش بتخلى الإعلان يخرج من الـ Learning Phase.
ايه هي الـ Learning Phase؟
كل مره اعلانك بيظهر، الفيسبوك بيجمع معلومات عن الناس والأماكن الأفضل اللى يقدر يظهر اعلانك فيها، والعلاقة هنا طردية بين ظهور الإعلان وفرصة تحسين الفيسبوك لنفس الإعلان.
الفترة دى اعلانك بيدخل فيها لما يكون الفيسبوك محتاج يتعلم عن اعلانك، خلال المرحلة دى الفيسبيوك هيحاول يشوف كل الطرق ويقارن بينها عشان يوصل للافضل.
في الوقت ده الوضع مش هيكون مستقر خالص، هتلاقى تضارب في الأرقام بشكل كبير، من الاخر نتيجة مش مرضية! وبقول مش مرضية لان الناس بتبدء تعمل اكبر غلطة وهى انهم بيبدؤا يعدلوا في الإعلان او يقرروا يوقفوه وفى النهاية الإعلان مش بيخرج من المرحلة دى ابداً وبالتالي كل مجهودك وفلوسك راحت في الهوا.
الفيسبوك بيحتاج 50 اكشن يحصل من الإعلان ده عشان يخرج من مرحلة التعلم.
الطريقة اللى الناس بتتعامل بيها مع مرحلة التعلم في الفيسبوك تعتبر أكبر سبب بيخليهم مش بيحققوا النتائج اللى عاوزينها، كله بيعمل اعلان ميلاقيش نتيجة منه، يعدل، ميلاقيش نتيجة، يعدل تانى، ميلاقيش نتيجة، يوقف الإعلان!
فلوس بتترمى على الأرض.
دول 3 حاجات الفيسبوك نفسه بيوصى بيهم في التعامل مع المرحلة دى:
1. متعملش تعديلات لحد متخلص المرحلة التعلم
2. استخدم إعلانات قليلة في الحملة الواحدة
3. استخدم ميزانية منطقية
احنا بنتعامل ازاى مع المرحلة دى؟
لو متابعنا اكيد عارف اننا بنقول دايماً ان الإعلان الهدف منه حاجه واحدة بس وهى ان الناس اللى تقرأه تاخد اكشن معين، الاكشن ده هو الـ Call to action اللى بيخليهم يقربوا من قرار الشراء خطوة.
مهما حصل لازم ده يتحقق من الإعلان، مش مهم بقى خرج ولا مخرجش من مرحلة التعلم، في النهاية الهدف بتاعنا بيتحقق.
دى الخطوات اللى بنعملها لما بنشتغل مع اى عميل:
بنعمل حملة الهدف منها تجيب عملاء ميعرفوناش من على الفيسيوك وبنسميها Prospecting، الحملة دى عبارة اعلان واحد.
اللى بيحصل ان الفيسبوك بيبدء يظهر الإعلان للناس اللى احنا حددناهم، بنصرف 500 جنيه والهدف منهم هم تظبيط الإعلان نفسه مش اى هدف تانى.
بنقيسها ازاى؟
لو هنفرض ان الإعلان الهدف منه بعد الناس متخلصه هو انهم يدوسوا على اللينك ويروحوا على الويب سايت، فلو الناس شافت الإعلان وعملت ده خلاص بنسيب الإعلان شغال، ومع الوقت بيخرج من مرحلة التعلم.
لو الناس مش بتروح على الموقع وبيسيبوا كومنت او بيعملوا شير … الخ! بنشوف المشكلة فين ونعالجها.
زى ماتفقنا الناس لازم تاخد الاكشن اللى انت عاوزه! ودى الحالة الوحيدة اللى تخليك تعدل الإعلان وتنفض للفيسبوك.
الفيسبوك بيحتاج 50 اكشن خلال 7 أيام! عشان كده الفيسبوك بيوصى انك تعمل حسابك على ميزانية منطقية، وده بيعمل مشكلة تانيه الناس مش بتعرف تتعامل معاها وهى ان الإعلان يحصلها حاجه اسمها Learning Limited؟
ايه هو الـ Learning limited؟ باختصار الإعلان بتاعك مش بيحصل منه كونفرجن كفاية تخلية يخرج من مرحلة التعلم.
تقريباً كل الناس بتسمع كلام الفيسبوك وبيعدلوا الإعلان ويرجع يتعلم من تانى! لو بتعمل زى الناس فاحنا بنقولك متعملش كده تانى، الا في حالة واحدة بس وهى ان الإعلان مش بيخلى الناس تاخد الاكشن اللى انت عاوزه.
في النهاية الفيسبوك نظام وانت المفروض تبقى اذكى منه، لو افترضنا ان خلال الأسبوع جالك 30 كونفرجن من الإعلان والفيسبوك عاوز 20 كونفرجن كمان عشان يخرج من المرحلة دى، متعدلش واصبر حتى لو هتصبر أسبوعين، هو هيخرج لوحدة، اه دى الحقيقة اللى ناس كتير اوى متعرفهاش، الفيسبيوك هيخرج بعد الـ 50 كونفرجن والوقت مش بيفرق.
لو عدلت الإعلان في الوقت ده هيرجع يعد من الصفر!
المختصر المفيد:
هتعمل حملة واحدة بإعلان واحد بس وخليك وراه لحد مالناس تأخد الاكشن اللى انت عاوزه ودى الحالة الوحيدة اللى محتاج تعدل فيها بس، ومتشغلش دماغك اوى هيخرج امتى طالما الناس بتعمل اللى انت عاوزه من الإعلان، واخيراً اوعى تعدل لو الفيسبوك قالك ان الـ Learning limited واصبر ومع الوقت هيخرج لوحده.
لما ده يحصل هيكون عندك حاجه بنسميها في الماركتينج الـ Winning Campaign وهي الحملة اللي شغالة وبتحقق نتائج ثابتة نسبيها والوقت مش بيغيرها.
ده سبب من الأسباب اللى بتخلينا نقول للعملاء، بتبيع لاى عدد عملاء انت عاوزه وهتتحكم الميزانية بتاعتك، عارف بتصرف كام وداخلك كام.
